ភ្នំពេញ ៖ ក្នុង ឱកាស អបអរសាទរខួបលើកទី៤២ ថ្ងៃបង្កើតរណសិរ្ស ២ធ្នូ ឆ្នាំ១៩៧៨ សម្ដេច ហេង សំរិន ប្រធានរដ្ឋសភា បានថ្លែងថា ទំរាំមានថ្ងៃនេះ កម្ពុជា បានធ្វើដំណើរដ៏វែងឆ្ងាយ ឆ្លងកាត់ការលំបាក និងឧបសគ្គរាប់ម៉ឺនជំពូក ដូច្នេះប្រជាពលរដ្ឋ ទាំងអស់គ្នាត្រូវរួមគ្នាការពារ ថែរក្សាសន្តិភាព ដែលទទួលបានដោយលំបាកនេះ ឲ្យបានគង់វង្ស យូរអង្វែង តរៀងទៅ ។
តាមរយៈ បណ្ដាញសង្គមហ្វេសប៊ុករបស់ សម្ដេច ហេង សំរិន នៅព្រឹកថ្ងៃទី២ ខែធ្នូ ឆ្នាំ ២០២០ បានឲ្យដឹងថា ថ្ងៃទី២ ធ្នូ នេះ ជាខួបលើកទី៤២ ទិវាកំណើត «រណសិរ្សសាមគ្គី អភិវឌ្ឍន៍មាតុភូមិកម្ពុជា» មានឈ្មោះដើមថា «រណសិរ្សសាមគ្គី សង្រ្គោះជាតិកម្ពុជា» ដែលបានបង្កើតឡើងនៅថ្ងៃទី២ ខែធ្នូ ឆ្នាំ១៩៧៨ នៅក្នុងតំបន់រំដោះ នាភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះ។
សម្ដេច រៀបរាប់ថា រណសិរ្ស២ធ្នូ ជាកម្លំាងមហាជន អ្នកស្នេហាជាតិ គ្រប់និន្នាការនយោបាយ ដឹកនាំបង្កើតដោយ សម្តេច ហេង សំរិន សម្តេច ជា ស៊ីម សម្តេចតេជោ ហ៊ុន សែន និងឥស្សរជនស្នេហាជាតិជាច្រើនទៀត ក្នុងការរំដោះប្រទេសជាតិចេញពីរបបខ្មែរ ប៉ុលពតប្រល័យពូជសាសន៍ នៅថ្ងៃទី៧ ខែមករា ឆ្នាំ១៩៧៩ ។
សម្ដេច បញ្ជាក់ ថា រណសិរ្ស ២ធ្នូ មិនត្រឹមតែបានជួយសង្គ្រោះអាយុជីវិតប្រជាពលរដ្ឋ ឱ្យចាកផុតពីមហន្ដរាយ នៃរបបអាវខ្មៅ ប៉ុណ្ណោះទេ ប៉ុន្ដែបានជួយស្ដារ កសាង និងអភិវឌ្ឍន៍ មាតុភូមិកម្ពុជាមានការកែប្រែមុខមាត់ថ្មីជាបន្ដបន្ទាប់ រហូតទទួលបានសុខសន្តិភាព ឯកភាពជាតិ និងការអភិវឌ្ឍ ដូចសព្វថ្ងៃនេះ។
សម្ដេច ហេង សំរិន មានប្រសាសន៍ថា «មាន២ធ្នូ ឆ្នាំ១៩៧៨ ទើបមានថ្ងៃ៧ ខែមករា ឆ្នាំ១៩៧៩ ហើយមាន៧ ខែមករា ឆ្នាំ១៩៧៩ ទើបមាន ថ្ងៃនេះ។ ទំរាំមានថ្ងៃនេះ យើងបានធ្វើដំណើរដ៏វែងឆ្ងាយ ឆ្លងកាត់ការលំបាក ឧបសគ្គរាប់ម៉ឺនជំពូក។ ឥស្សរជន អតីតយុទ្ធអ្នកស្នេហាជាតិយើងរាប់មិនអស់ បានពលីកម្មអាយុជីត បូជាសាច់ស្រស់ឈាមស្រស់ ក្នុងបុព្វហេតុជាតិមាតុភូមិ ដោយមិនខ្លាចនឿយហត់ និងស្តាយស្រណោះអាយុជីវិតនោះ ឡើយ»។
សម្ដេច បន្ថែមថា «ចូរយើងទាំងអស់គ្នារួមគ្នាការពារ ថែរក្សាសន្តិភាព ដែលយើងទទួល បានដោយលំបាកនេះ ឱ្យបានគង់វង្ស យូររអង្វែង តរៀងទៅ ដើម្បីប្រទេសជាតិយើង ទទួលបានការអភិវឌ្ឍបន្តបន្ទាប់ ឈានទៅរក ភាពរុងរឿង ដូចអារ្យប្រទេស ក្នុងពេលខាងមុខនេះ»៕
ដោយ ៖ អេង ប៊ូឆេង
