ព័ត៌មានជាតិ

អគ្គនាយកនៃធនាគារអភិវឌ្ឍន៍ជនបទ អញ្ជើញសំណេះសំណាល ជាមួយ នាយក នាយិកា លោកគ្រូ និងអ្នកគ្រូ នៅវិទ្យាល័យទាំង៤ ក្នុងស្រុកខ្សាច់កណ្តាល

ភ្នំពេញ៖ លោក កៅថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃធនាគារអភិវឌ្ឍន៍ជនបទ និងកសិកម្ម និងជាប្រធានក្រុមការងារទទួលបន្ទុកចលនាយុវជនស្រុកខ្សាច់កណ្តាល ជាតំណាងដ៏ខ្ពង់ខ្ពស់ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារថ្នាក់ជាតិចុះមូលដ្ឋានខេត្តកណ្តាល ទទួលបន្ទុកស្រុកខ្សាច់កណ្តាល ស្រុកល្វាឯម និងស្រុកកៀនស្វាយ នៅថ្ងៃទី២៨ ខែមករា ឆ្នាំ២០២១ បានអញ្ជើញចូលរួមជាអធិបតីភាព​ ក្នុងកម្មវិធីសំណេះសំណាលជាមួយ នាយក នាយិកា នាយករង នាយិការង លោកគ្រូ និងអ្នកគ្រូទាំងអស់ ក្នុងវិទ្យាល័យទាំង ៤ ក្នុងស្រុកខ្សាច់កណ្តាលសរុប ចំនួន ៣២៤ នាក់ ។

តាមរយៈរបាយការណ៍របស់ លោក ប៊ុន ផេង អភិបាលនៃគណៈអភិបាលស្រុកខ្សាច់កណ្តាល បានឱ្យដឹងថា នៅស្រុកខ្សាច់កណ្តាល មានប្រជាជនសរុបចំនួន ១៥១ ៤៩៦ នាក់ ស្រី ៧៧ ០៥៨នាក់ ហើយប្រជាជនមានអាយុចាប់ពី ១៨ ឆ្នាំឡើងទៅ មានសរុប ៩៩ ៤៦៣ នាក់ ស្រី ៥១ ៤៤១ នាក់។ ចំពោះសាលារៀនវិញ មានចំនួន៦៤កន្លែង និងមានអគារសិក្សាសរុប ២១៤ខ្នង ស្នើនឹង៩៨៧បន្ទប់ ក្នុងនោះមាន៦៣ អគារ ស្នើនឹង២៨៦បន្ទប់ គឺជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ចំពោះបុគ្គលិកសិក្សាសម្រាប់ស្រុកខ្សាច់កណ្តាលទាំងមូល មាន ចំនួន ១១២៥នាក់ ស្រី ៥៩៣នាក់ និងមានសិស្សសរុប ចំនួន ៣៣ ៤៨៩ នាក់ ស្រី ១៦ ៤១៥នាក់។ ដោយឡែក ក្នុងឆ្នាំសិក្សា ២០១៩ ២០២១ ជាពិសេសសម្រាប់ថ្នាក់ទី១២ កម្មវិធីសិក្សា របស់វិទ្យាល័យទាំង ៤ ក្នុងស្រុកខ្សាច់កណ្តាល ត្រូវទទួលរងផលប៉ះពាល់ដោយសារជំងឺឆ្លងកូវីដ ១៩ ប៉ុន្តែទោះបីជាយ៉ាងណា ក៏វិទ្យាល័យរបស់ស្រុកខ្សាច់កណ្តាល បានបន្តពង្រឹងកម្មវិធី បណ្តុះបណ្តាល សិស្សានុសិស្សទាំងអស់ឱ្យទទួលបានគុណភាពល្អ។ តាមរយៈកម្មវិធីបំប៉នចុងសប្តាហ៍ដល់សិស្សថ្នាក់ទី១២ គឺទទួលបានការឧបត្ថម្ភ និងលើកទឹកចិត្តពីឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី ។ ទន្ទឹមនេះ ក្នុងសម័យប្រឡងមធ្យមសិក្សាទុតិយភូមិ មានបេក្ខជនដាក់ពាក្យប្រឡង ចំនួន ៩៣៩ នាក់ ស្រី ៥២៥នាក់ ហើយត្រូវបានក្រសួងអប់រំ ផ្តល់អាទិភាពឱ្យជាប់ដោយស្វ័យប្រវត្តិ។

ជាកិច្ចចាប់ផ្តើម មុនចូលដល់បទអន្តរាគមន៍របស់ លោក កៅ ថាច ប្រតិភូរាជរដ្ឋាភិបាល លោកបានធ្វើការថ្លែងអំណរគុណយ៉ាងជ្រាលជ្រៅ ដោយស្មោះស្ម័គ្រ និងគារគោរពដឹងគុណ ដល់លោកគ្រូ អ្នកគ្រូទាំងអស់ដែលមានវត្តមាននៅក្នុងកម្មវិធីនៅព្រឹកនេះ។ ជាមួយគ្នានេះ ឯកឧត្តម បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសូងសេដ្ឋកិច្ចនិងហិរញ្ញវត្ថុផងដែរ។

ទន្ទឹមនេះ លោក កៅ ថាច បានធ្វើការកត់សម្គាល់នូវចំនុចសំខាន់មួយចំនួនថា

១.តាមរយៈកំណែទម្រង់ស៊ីជម្រៅរបស់រាជរដ្ឋាភិបាល ជាពិសេសការពង្រឹងលើប្រព័ន្ធអប់រំនៅកម្ពុជា ក្នុងមួយរយៈកាលចុងក្រោយនេះកម្មវិធីសិក្សាអប់រំបានកែប្រែយ៉ាងខ្លាំង សិស្សានុសិស្សបានខិតខំពង្រឹងខ្លួនទាំងសមត្ថភាព និងចំណេះដឹង ជាក់ស្តែងលទ្ធផលនៃការប្រឡងបាក់ឌុបក្នុងឆ្នាំកន្លងមក ជាសក្ខីភាពបង្ហាញពីភាពជោគជ័យនៃកំណែទម្រង់ប្រព័ន្ធអប់រំ តាមរយៈពាក្យស្លោក អ្នកចេះគឺជាប់។ ដោយឡែកសម្រាប់ស្រុកខ្សាច់កណ្តាល ក្នុងឆ្នាំសិក្សា ២០១៨ ២០១៩ ដោយការខិតខំបង្រៀន និងការយកចិត្តទុកដាក់ខ្ពស់របស់លោកគ្រូ អ្នកគ្រូ ក្នុងការបង្រៀនសិស្ស ជាពិសេសសិស្សថ្នាក់ទី១២ លទ្ធផលនៃការប្រឡងបាក់ឌុបមធ្យមសិក្សាទុតិយភូមិ សិស្សបានប្រឡងជាប់រហូតដល់ ៧៦ % នេះជាលទ្ធផលល្អប្រសើរ។ ចំពោះឆ្នាំសិក្សា ២០២០ ក្នុងបរិបទកូវិឌ ១៩ ប្រព័ន្ធអប់រំត្រូវបានកែប្រែយ៉ាងខ្លាំង ដោយសិស្សត្រូវប្តូរពីការរៀនក្នុងសាលា ទៅរៀនតាមប្រព័ន្ធអនឡាញ់វិញ ដែលការណ៍នេះ ជាបរិបទថ្មីដែលលោកគ្រូ អ្នកគ្រូត្រូវតាមឱ្យទាន់ និងមានភាពបទបែនខ្ពស់ចំពោះការវិវត្តនេះ។

២.ការធ្វើទំនើបកម្មប្រព័ន្ធបច្ចេកវិទ្យាបែបឌីជីថល និងការធ្វើទំនើបកម្មប្រពន្ធអប់រំ លោក កៅ ថាច បានធ្វើការកត់សម្គាល់បន្ថែមទៀតថា បច្ចុប្បន្ននេះ ក្មេងៗ និងយុវជន យុវនារី មានភាពឈ្លាវវៃ និងពូកែ ជាពិសេសលើប្រព័ន្ធបច្ចេកវិទ្យា (IT) ។ ក្នុងន័យនេះដើម្បីដើរឱ្យទាន់បរិបទថ្មី លោក បន្តលើកទឹកចិត្ត និងស្នើសុំដល់លោកគ្រូ អ្នកគ្រូត្រូវតែធ្វើការស្រាវជ្រាវចំណេះដឹងថ្មីៗ បន្ថែម ដែលកំពុងវវិត្តន៍ក្នុងបរិការណ៍ថ្មី ដើម្បីយកចំណេះដឹងទាំងនោះ ទៅចែករំលែកបន្តដល់សិស្សានុសិស្ស។

៣.ចែករំលែកបទពិសោធន៍នៃការសិក្សាអប់រំផ្ទាល់ខ្លួន៖ លោកបានលើកយកបទពិសោធន៍ និងលើកយកទស្សនៈផ្ទាល់ខ្លួន របស់លោកផ្ទាល់ដែលបានឆ្លងកាត់ការសិក្សាទាំងក្នុងស្រុក និងនៅបរទេស ក៏ដូចជាវគ្គបណ្តុះបណ្តាលផ្សេងៗ ដើម្បីចែករំលែកជាចំណេះដឹងថ្មីបន្ថែម ដល់លោកគ្រូ អ្នកគ្រូផងដែរ។ ជាមួយគ្នានេះលោកបានស្នើសុំលោកគ្រូ អ្នកគ្រូ បន្តការអានសៀវភៅ ធ្វើការស្រាវជ្រាវ អោយបានច្រើន ពីព្រោះការអាន ធ្វើឱ្យយើងទទួលបានចំណេះដឹងថ្មីៗ និងដើរទាន់ការវិវត្តន៍របស់ពិភពលោក។ ម្យ៉ាងទៀតក្នុងនាមជាគ្រូបង្រៀន គឺជាសេចក្តីសង្ឃឹមរបស់សិស្ស និងអាណាព្យាលបាលរបស់សិស្ស ដែលបានផ្ញើរអណាគត់កូនៗរបស់គាត់ដើម្បីឱ្យក្លាយជាសិស្សពូកែ មានចំណេះដឹង ជំនាញច្បាស់លាស់ ក្លាយជាពលរដ្ឋល្អ សិស្សល្អ។ ដូចនេះលោកគ្រូ អ្នកគ្រូ ត្រូវតែពង្រឹង និងពង្រីក សមត្ថភាព និងចំណេះដឹងឱ្យរឹងមាំដើម្បីផ្ទេរបន្តទៅឱ្យពួកគេ។

៤.មតិផ្តាំផ្ញើរ៖ យកឱកាស នៃការជួបជុំនៅព្រឹកនេះ លោកបានសំណូមពរដល់លោកគ្រូ អ្នកគ្រូជួយបណ្តុះបណ្តាលទាំងជំនាញទុន និងជំនាញរឹង និងជួយបណ្តុះស្មារតីសិស្សឱ្យចេះស្រឡាញ់កីឡា ស្រឡាញ់ការងារសង្គមជាតិ បណ្តុះឥរិយាបឱ្យមានសុជីវធម៌ គុណធម៌ និងមានសីលធម៌ខ្ពស់។ ជាពិសេស ជួយបណ្តុះឱ្យសិស្សមានភាពម្ចាស់កាល និងឯករាជ្យក្នុងសិក្សា ស្រាវជ្រាវ និងបណ្តុះការអានសៀវភៅឱ្យបានច្រើន។ ឯកឧត្តម ស្នើសុំឱ្យសាលារៀបចំបណ្ណាល័យឱ្យបានស្អាត នៅតាមវិទ្យាល័យ និងដាក់សៀវភៅអានឱ្យបានច្រើន និងគ្រប់គ្រាន់ ដើម្បីជួយដល់សិស្សឱ្យមានសមត្ថភាពក្នុងការស្រាវជ្រាវ។

ចុងបញ្ចប់នៃកិច្ចសំណេះសំណាលដើម្បីជាការលើកទឹកចិត្ត និងថ្លែងអំណរគុណដល់កិច្ចខំប្រឹងប្រែងរបស់លោកគ្រូ អ្នកគ្រូ លោក កៅ ថាច បានពាំនាំថវិកាដ៏ថ្លែថ្លា របស់ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ដើម្បីធ្វើការឧបត្ថម្ភ ជូនដល់លោកគ្រូ អ្នកគ្រូ ដែលបានចំណាយពេលបង្រៀនបំប៉ន សិស្សថ្នាក់ទី១២ ដើម្បីត្រៀមប្រឡងបាក់ឌុប ឆ្នាំសិក្សា ២០១៩ ២០២០ កន្លងមក ចំនួន ១៥ លានរៀល និងលោកគ្រូ អ្នកគ្រូចំនួន ៣២៤ នាក់ ដែលមានវត្តមានក្នុងកម្មវិធី ក្នុងម្នាក់ៗចំនួន ៤ ម៉ឺនរៀល និងឧបត្ថម្ភដល់សាលាស្រុក ចំនួន ១លានរៀលផងដែរ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។

All rights reserved by: DAP News

To Top
×