ព័ត៌មានជាតិ

កម្ពុជាត្រៀមខ្លួន ជាស្រេចរៀបចំព្រឹត្តិការណ៍ជាតិ-អន្ដរជាតិ នៅឆ្នាំ២០២២ មិនមានអ្វីប្រែប្រួល ឡើយ

ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងថា កម្ពុជាត្រៀមខ្លួនជា ស្រេច សម្រាប់រៀបចំព្រឹត្តិការណ៍ជាតិ-អន្ដរជាតិធំៗ ដូចជា កិច្ចប្រជុំកំពូលអាស៊ីអឺរ៉ុប នាឆ្នាំ២០២២ ខាងមុខនេះ ដោយមិនមានអ្វីប្រែប្រួល ឡើយ។

ក្នុងជំនួបពិភាក្សាការងារជាមួយ លោក MIKAMI Masahiro ឯកអគ្គរាជទូតជប៉ុន ប្រចាំកម្ពុជា នារសៀលថ្ងៃទី១០ ខែមិថុនា ឆ្នាំ២០២១ នៅទីស្ដីការក្រសួងមហាផ្ទៃ សម្ដេចក្រឡាហោម ស ខេង បានជម្រាបជូនថា «ជាការពិតបណ្ដាព្រឹត្តិការណ៍ជាតិធំៗ ក៏ដូចជា ព្រឹត្តិការណ៍អន្តរជាតិធំៗ ដែលកម្ពុជានឹងធ្វើជាម្ចាស់ផ្ទះ ព្រមទាំង ប្រារព្ធធ្វើជាបន្តបន្ទាប់នោះ កម្ពុជាបានត្រៀមថានឹងប្រព្រឹត្តទៅតាមកាលវិភាគ ឬកម្មវិធីដែលបានគ្រោងទុក ដោយមិនមានអ្វីប្រែប្រួលនោះឡើយ»។

នាឱកាសនោះ លោកឯកអគ្គរាជទូតជប៉ុន លើកឡើងថា នៅក្នុងឆ្នាំ២០២១ និងឆ្នាំបន្តបន្ទាប់ទៀត កម្ពុជានឹងត្រូវប្រារព្ធធ្វើនៅព្រឹត្តិការណ៍ជាតិ និងអន្តរជាតិធំៗជាច្រើន ដូចជា កិច្ចប្រជុំកំពូលអាស៊ីអឺរ៉ុប និងប្រធានអាស៊ានឆ្នាំ២០២២ និងព្រឹត្តិការណ៍ជាតិ ដូចជា ការបោះឆ្នោត ជាបន្ទាប់។

លោក ក៏បានលើកឡើងពីការត្រៀមខ្លួនរបស់ភាគីជប៉ុន សម្រាប់ការបន្តធ្វើកិច្ចសហប្រតិបត្តិការជាមួយ រាជរដ្ឋាភិបាលកម្ពុជា ក៏ដូចជា ក្រសួងមហាផ្ទៃ ក្នុងការរួមចំណែកធ្វើឱ្យព្រឹត្តិការណ៍ជាតិ និងព្រឹត្តិការណ៍អន្តរជាតិធំៗ ទាំងនោះ មានដំណើរការទៅប្រកបដោយជោគជ័យ ផងដែរ។

ជាការឆ្លើយតប សម្ដេច ស ខេង បានថ្លែងអំណរគុណបំណងដ៏ល្អរបស់ភាគីជប៉ុន ដែលត្រៀមផ្ដល់ កិច្ចសហការគាំទ្រដល់ការប្រារព្ធបណ្ដាព្រឹត្តិការណ៍ធំៗ ទាំងនោះ ឱ្យទទួលបានជោគជ័យ។ សម្ដេច ក៏ត្រៀមខ្លួនក្នុងការបន្តនូវកិច្ចសហប្រតិបត្តិការ ក៏ដូចជា ពិភាក្សាលើបញ្ហានានា ក្នុងគោលដៅពង្រឹងពង្រីកិច្ចសហប្រតិបត្តិការទ្វេភាគី កម្ពុជា ជប៉ុនឱ្យកាន់តែរីកចំរើនខ្លាំងក្លាថែមទៀត៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×