ព័ត៌មានជាតិ

សម្ដេចតេជោ ស្នើអង់គ្លេស ផ្តល់ជំនួយវ៉ាក់សាំងបន្តទៀត និងជួយកម្ពុជាទិញវ៉ាក់សាំង Astra Zeneca

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានស្នើចក្រភពអង់គ្លេសផ្តល់ជំនួយមនុស្សធម៌ជាវ៉ាក់សាំងបន្តទៀត ក៏ដូចជា ជួយសម្របសម្រួលដល់កម្ពុជា ក្នុងការបញ្ជាទិញវ៉ាក់សាំង AstraZeneca បន្ថែម សម្រាប់បំពេញនាពេលអនាគត។

ក្នុងពិធីប្រគល់-ទទួលអំណោយ វ៉ាក់សាំងកូវីដ-១៩ ប្រភេទ Astra Zeneca ចំនួន ៤១៥.០០០ ដូស ពីរដ្ឋាភិបាល និងប្រជាជន នៃចក្រភពអង់គ្លេស ជូនរាជរដ្ឋាភិបាល និង ប្រជាជនកម្ពុជា នាថ្ងៃទី៥ ខែសីហា ឆ្នាំ២០២១ សម្ដេចតេជោ បានអំណរគុណរដ្ឋាភិបាល និងប្រជាជននៃចក្រភពអង់គ្លេស ដែលបានផ្តល់វ៉ាក់សាំង បង្ការជំងឺកូវីដ-១៩ដល់រាជរដ្ឋាភិបាល និងប្រជាជនកម្ពុជាដែលជាជំនួយ សប្បុរសធម៌ដ៏ថ្លៃថ្លា និងជាសន្តានចិត្តជួយគ្នា ក្នុងគ្រាលំបាក ក្នុងបរិការណ៍វ៉ាក់សាំង គឺជាទំនិញយុទ្ធសាស្រ្តគន្លឹះ និង មានតម្រូវការខ្ពស់ ក្នុងសមរភូមិប្រយុទ្ធការឆ្លងរាលដាលជំងឺកូវីដ នៅគ្រប់ទិសទី ពិភពលោក ។

សម្ដេចតេជោបន្ដថា ស្ថានភាពបច្ចុប្បន្ន ពោរពេញទៅដោយភាពមិនប្រាកដប្រជា ដោយសារ មេរោគកូវីដ-១៩ បន្តវិវត្ត និងបំប្លែងខ្លួនឥតឈប់ឈរ ទៅជាប្រភេទ មេរោគបំប្លែងថ្មី ជាពិសេស មេរោគប្រភេទដែលតា (Delta) ដែលបាននិងកំពុងឆ្លងរាលដាលយ៉ាងខ្លាំង នៅតាមបណ្ត ប្រទេសនានា ក៏ដូចជានៅកម្ពុជា ។ ដោយឈរលើស្មារតីប្រុងប្រយ័ត្នខ្ពស់ និងការយកចិត្តទុកដាក់ជា ចម្បងចំពោះ សុខភាពសាធារណៈ និងការជួយសង្គ្រោះអាយុជីវិតរបស់ប្រជាពលរដ្ឋ រាជរដ្ឋាភិបាល កម្ពុជាបានសម្រេច បិទខ្ទប់ខេត្តមួយចំនួន និងតំបន់ខ្លះក្នុងរាជធានីភ្នំពេញ និងដាក់ចេញនូវយុទ្ធនាការ ពង្រឹងវិធានការប្រយុទ្ធ និងទប់ស្កាត់ការឆ្លងរាលដាល នៃជំងឺកូវីដ-១៩ ។

សម្ដេចតេជោមានប្រសាសន៍ថា «ខ្ញុំសូមស្នើចក្រភពអង់គ្លេស ផ្តល់ជា ជំនួយមនុស្សធម៌ ជាវ៉ាក់សាំងបន្តទៀត ក៏ដូចជាជួយសម្របសម្រួល ដល់កម្ពុជា នៅក្នុងការបញ្ជាទិញ វ៉ាក់សាំង AstraZeneca បន្ថែម សម្រាប់បំពេញសេចក្តីត្រូវការ ចាំបាច់នាពេលអនាគត»។

សម្ដេចតេជោ បន្ថែមថា ជាមួយគ្នានេះដែរ កម្ពុជា ក៏ដូចជាបណ្តាប្រទេស ជាច្រើន បាននិងកំពុងផ្តោតការយកចិត្ត ទុកដាក់ជាសំខាន់លើយុទ្ធនាការ ចាក់វ៉ាក់សាំង ដែលជាដំណោះស្រាយដ៏សមស្របបំផុត ក្នុងការ ប្រយុទ្ធ និងការគ្រប់គ្រងការឆ្លង រាលដាលនៃជំងឺកូវីដ-១៩ ។ យោងតាមអង្គការសុខភាពពិភពលោក (WHO), វ៉ាក់សាំងពិតជាអាចផ្ដល់ការការពារ ទៅនឹងមេរោគកូវីដ-១៩ រួមទាំងមេរោគបំប្លែងថ្មី ប្រភេទ ដែលតា ផងដែរ ។ ដោយយល់យ៉ាងច្បាស់លាស់អំពីអត្ថប្រយោជន៍ដ៏សំខាន់នេះ, រាជរដ្ឋាភិបាល បានខិតខំ និង ព្យាយាមស្វែងរក វ៉ាក់សាំងតាម រយៈយន្តការដែលមាន ជាទ្វេភាគីក្ដី ជាពហុភាគីក្ដី ក្នុងរូបភាពជាជំនួយ មនុស្សធម៌ក្តី និងជាការបញ្ជាទិញដោយផ្ទាល់ក្តី។

សម្ដេចតេជោ បន្ថែមថា ស្របពេលជាមួយគ្នានេះផងដែរ រាជរដ្ឋាភិបាលកម្ពុជា ក៏បានសម្រេចដាក់ចេញ នូវយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី ៣ ឬ ដូសជំរុញ ជូនដល់មន្ត្រីបម្រើសេវាសាធារណៈជួរមុខ ដែលកំពុងបម្រើការ នៅតាមបណ្តាខេត្តនានា ដែលស្ថិត នៅតាមព្រំដែន ជាមួយនឹងប្រទេសថៃ ដែលមេរោគបំប្លែងថ្មី ប្រភេទដែលតា កំពុងវាយលុក និង រាលដាល ។

សម្ដេចតេជោ ក៏បានគូសបញ្ជាក់ថា វ៉ាក់សាំង AstraZeneca ដែលជាជំនួយមនុស្សធម៌ដ៏ថ្លៃថ្លារបស់ ប្រជាជន និងរដ្ឋាភិបាលនៃចក្រភពអង់គ្លេសនេះ នឹងត្រូវប្រើប្រាស់ក្នុងយុទ្ធនាការ ចាក់វ៉ាក់សាំង បង្ការជំងឺកូវីដ-១៩ ដូសទី ៣ ឬ ដូសជំរុញ នេះ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top