ភ្នំពេញ៖ លោក គុណ ញឹម រដ្ឋមន្រ្តីប្រតិភូអមនាយករដ្ឋមន្ត្រី អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានថ្លែងថា វេលានេះ ជាឱកាសល្អមួយ សម្រាប់ម្ចាស់យានយន្តទាំងឡាយ ដែលអត់ទាន់បង់ពន្ធនាំចូល សូមអញ្ជើញមកបង់ពន្ធឱ្យបានទាន់វេលា ជាពិសេសទទួលបានចុះតម្លៃ១០ភាគរយ នៃប្រាក់ពន្ធសរុបដែលត្រូវបង់ជូនរដ្ឋ។
តាមរយៈសន្និសីទសារព័ត៌មាន អនឡាញ (online) លោក គុណ ញឹម បានបង្ហាញនូវក្តី សង្ឃឹមនឹងជឿជាក់ថា ម្ចាស់យានយន្តដែលមិនទាន់បង់ទាន់បង់ពន្ធ អាករគយនិងរដ្ឋករ ក៏ល្មមដល់ពេលបំពេញកាតព្វកិច្ចរបស់ខ្លួន ជាពលរដ្ឋល្អហើយ ក្នុងគ្រាមួយដែលរដ្ឋ ត្រូវការចំណូលបន្ថែម អំឡុងពេលកូវីដ១៩ កំពុងបន្តអូសបន្លាយ។
លោក គុណ ញឹម បានលើកឡើងថា “យើងមានកាតព្វកិច្ច ក្នុងការរកចំណូលជូនរដ្ឋ។ ដូចបានជ្រាបហើយថា រាជរដ្ឋាភិបាល បានបញ្ចេញសាច់ប្រាក់ច្រើនណាស់ ជួយដល់បងប្អូនប្រជាពលរដ្ឋដែលជួបការខ្វះខាត ទាំងកម្មកររោងចក្រ ។ល។ល។” “ចំណាយច្រើន ចំណូលទាប មិនមែនជារឿងល្អឡើយ ដូច្នោះហើយ យើងត្រូវខិតខំបំពេញភារកិច្ចប្រមូលពន្ធជូនរដ្ឋ”។
រដ្ឋមន្រ្តីអមប្រតិភូ ក៏បានរំលេចឡើងវិញផងដែរថា ក្នុងអំឡុងពេលការរីករាលដាលជំងឺកូវីដ១៩នេះ គឺមានករណីរត់ពន្ធយានយន្ត ប្រមាណពី៨ ទៅ១០គ្រឿង ក្នុង១ថ្ងៃ ដែលធ្វើឱ្យរដ្ឋបាត់ចំណូលយ៉ាងខ្លាំង ដែលកាលពីមុន មានត្រឹមតែពី ១ទៅ៣គ្រឿងតែប៉ុណ្ណោះ។
ពន្ធនាំចូលលើយានយន្ត បានគ្រប់ដណ្តប់ប្រមាណ ៥៣ភាគរយ នៃចំណូលពន្ធរបស់អគ្គនាយកដ្ឋានគយ និងរដ្ឋករ។ នេះបើតាមការបញ្ជាក់របស់លោក គន់ ញឹម។
យ៉ាងណាក៏ដោយ លោក សង្ឃឹមនឹងជឿជាក់ថា វិធានការថ្មីរបស់អគ្គនាយកដ្ឋានគយ និងរដ្ឋករនេះ នឹងគៀងគរចំណូលបន្ថែមជូនរដ្ឋ និងធានាបាននូវការប្រកួតប្រជែងដោយស្មើភាពគ្នា ផងដែរ។
ដោយៈ សយ សុភា
