ព័ត៌មានជាតិ

រដ្ឋបាល ខេត្តបាត់ដំបង បំភ្លឺ ជុំវិញការលាលែងពី ការងារ របស់លោក លី ឌីនូរី

ភ្នំពេញ​៖ រដ្ឋបាលខេត្តបាត់ដំបង នៅថ្ងៃទី១៩ ខែមករា ឆ្នាំ២០២២នេះ បានចេញសេចក្ដីបំភ្លឺ ជុំវិញករណី លាលែងពីការងារ របស់លោក លី ឌីនូរី ក្រោមហេតុផល មានការបង្កើតបក្ខពួក នៅក្នុងសាលាខេត្ត។

បើតាមសេចក្ដីបំភ្លឺរបស់ អ្នកនាំពាក្យរដ្ឋបាលខេត្តបាត់ដំបង បានបញ្ជាក់ថា «លោក លី ឌីនូរី បច្ចុប្បន្នជាមន្រ្តីការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធនធានមនុស្សសាលាខេត្តបាត់ដំបង ក្នុងរយៈពេល២សប្ដាហ៍ចុងក្រោយនេះ បានអវត្តមានគ្មានច្បាប់អនុញ្ញាតជាប់ៗគ្នា ដោយគ្មានមូលហេតុ និងគ្មានការជូនដំណឹង។ ដើម្បីពង្រឹងការគ្រប់គ្រងមន្រ្តីរាជការស្របតាមគោលការណ៍ និងនីតិវិធីគ្រប់គ្រងបុគ្គលិករដ្ឋបាលថ្នាក់ក្រោមជាតិ រដ្ឋបាលខេត្តបានធ្វើការអញ្ជើញលើកទី១ ដើម្បីឱ្យលោក លី ឌីនូរី ចូលមកធ្វើការវិញនិងទុកឱកាស ឱ្យមន្រ្តីរូបនេះ កែប្រែកំហុសរបស់ខ្លួនឡើងវិញ ប៉ុន្តែផ្ទុយទៅវិញបុគ្គលរូបនេះ ពុំបានចូលមកបង្ហាញខ្លួន នៅការិយាល័យគ្រប់គ្រងបុគ្គលិក តាមការអញ្ជើញនោះទេ ហើយសាមីខ្លួនក៏ពុំបានសាកសួរ ព័ត៌មានមកអង្គភាពខ្លួនដែរ បែរធ្វើការបង្ហោះសារ និងរូបភាពនៅលើគណនីហ្វេសប៊ុក របស់ខ្លួនដែលនាំឱ្យសាធារណជន មានការភាន់ច្រឡំ មកលើការដឹកនាំ របស់រដ្ឋបាលខេត្តបាត់ដំបង»។

តាមរយៈសេចក្ដីបំភ្លឺនេះ ក៏បានឱ្យដឹងផងដែរថា លោក លី ឌីនូរី ធ្លាប់ធ្វើមានមុខតំណែង ជាអភិបាលរងស្រុកថ្មគោលផងដែរ ប៉ុន្តែដោយសារភាពអសកម្មក្នុងការបំពេញតួនាទីរបស់លោក ក៏ត្រូវបានក្រសួងមហាផ្ទៃសម្រេចផ្ទេរភារកិច្ចឱ្យមកបម្រើការងារ ជាមន្រ្តីនៅសាលាខេត្តបាត់ដំបង ក្នុងអំឡុងខែមីនា ឆ្នាំ២០១៩។

ផ្ទាំងពាណិជ្ជកម្ម

សូមរំលឹកថា យោងតាមពាក្យស្នើសុំលាឈប់ ពីការងារដែល លោក លី ឌីនូរី ផ្ញើជូនសម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី១៨ ខែមករា ឆ្នាំ២០២២ បានឲ្យដឹងថា “ខ្ញុំបានបំពេញភារៈកិច្ចជាមន្ត្រីរាជការ ក្របខណ្ឌក្រសួងមហាផ្ទៃ ចាប់តាំង ពីឆ្នាំ២០០៧ រហូតបច្ចុប្បន្ន ជាមន្ត្រីសាលាខេត្តបាត់ដំបង ។ ដោយសារខ្ញុំពុំពេញចិត្ត នឹងការបង្កើតបក្ខពួក ក្នុង សាលាខេត្តបាត់ដំបង ខ្ញុំសូមគោរពស្នើសុំលាឈប់ ពីក្របខណ្ឌមន្ត្រីរាជការ ស៊ីវិល ក្រសួងមហាផ្ទៃ ចាប់ពីពេលនេះតទៅ” ។

ជុំវិញករណី រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ ក៏បានបង្ហាញការសោកស្តាយ ចំពោះមន្រ្តីរដ្ឋបាល សាលាខេត្តបាត់ដំបងរូបនេះផងដែរ៕

To Top