ព័ត៌មានជាតិ

Update ៖ សម្តេចតេជោ ឲ្យរដ្ឋមន្រ្តី២ ក្រសួងជួបប្រជុំគ្នា ដើម្បីដកចេញវិធានការ ពាក់ម៉ាស់តាមទីសាធារណៈ (Video)

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំឲ្យលោក អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល ជួបប្រជុំ និងពិភាក្សាគ្នា ដើម្បីដកចេញវិធានការកាតព្វកិច្ចពាក់ម៉ាស់ នៅតាមទីសាធារណៈ ប៉ុន្ដែតម្រូវឲ្យពាក់ម៉ាសនៅកន្លែងបិទជិត។ បើតាមសម្តេច ការជួបប្រជុំរវាងរដ្ឋមន្រ្តីទាំង២ នឹងធ្វើឡើងនៅរសៀលថ្ងៃ២៥ មេសា នេះ ។

កម្ពុជា បានសម្រេចដកកាតព្វកិច្ចពាក់ម៉ាស់នៅខេត្តចំនួន៤ម្តងរួចមកហើយ មុនពេលបុណ្យចូលឆ្នាំខ្មែរ ។ ខេត្តទាំង៤នោះរួមមាន ៖ រតនគិរី មណ្ឌលគិរី ស្ទឹងត្រែង និងព្រះវិហារ។

បើតាមសម្តេចតេជោ ក្នុងពិធីប្រគល់-ទទួល អំណោយវ៉ាក់សាំងកូវីដ-១៩ ជាង ១លានដូស ជាអំណោយរបស់រដ្ឋាភិបាល និងប្រជាជនអ៊ីតាលី នាព្រឹកថ្ងៃទី២៥ ខែមេសា ឆ្នាំ២០២២ លើកឡើងថា មូលហេតុនាំឲ្យមានការប្រជុំដកកាតព្វកិច្ចពាក់ម៉ាស់នេះ ដោយសារសម្ដេចមើលឃើញថា អាត្រាឆ្លងជំងឺកូវីដ១៩ ក្នុងឱកាសបុណ្យចូលឆ្នាំមានចំនួនតិចបំផុត ទោះបីជាមានការជួបជុំនៅតាមទីតាំងសាធារណៈនានាយ៉ាងណែនតែនតាប់យ៉ាងណាក៏ដោយ ដែលហៅថា សមុទ្រមនុស្សនោះ ។

សម្ដេចតេជោ មានប្រសាសន៍ថា «ឥឡូវ ខ្ញុំបានណែនាំឲ្យឯកឧត្តម អូន ព័ន្ធមុនីរ័ត្ន ឯកឧត្តម ម៉ម ប៊ុនហេង ដឹកនាំការប្រជុំ ហើយខ្ញុំ ក៏បាននិយាយមុននេះបន្ដិចជាមួយឯកឧត្តម ម៉ម ប៊ុនហេង យប់មិញក៏បាននិយាយជាមួយលោកជំទាវ យក់ សម្បត្តិ ។ ខ្ញុំ ចង់ឲ្យមានការដកចេញនូវកាតព្វកិច្ចពាក់ម៉ាស នៅតាមទីសាធារណៈ ក៏ប៉ុន្ដែតម្រូវឲ្យពាក់ម៉ាសនៅតាមទីកន្លែងដូចជា កន្លែងបិទជិត ជាដើម»។

ចំណុចទាំងនេះ សម្តេចបានសង្កេតឃើញថា ពេលពិធីបុណ្យចូលឆ្នាំកន្លងទៅ មានប្រជាពលរដ្ឋយ៉ាងតិចណាស់ដែលបានពាក់ម៉ាសក្នុងពេលលេងកម្សាន្ដ។ សម្ដេចថា នៅទីរួមខេត្តតាកែវ និងកំពង់ចាម មានការប្រគំតម្ដ្រីហើយក្នុងចំណោម១ពាន់នាក់ ប្រហែល២ ឬ ៣នាក់ប៉ុណ្ណោះ បានពាក់ម៉ាស់ ហើយពុំមានរក្សាគន្លតនោះទេ។ សម្ដេចថា បញ្ហាទាំងនេះ មិនត្រូវមើលបញ្ហាសុខភាពមួយមុខនោះទេ ត្រូវមើលបញ្ហាសេដ្ឋកិច្ចសង្គម ផងដែរ។

ផ្ទាំងពាណិជ្ជកម្ម

លើសពីនេះ សម្ដេចតេជោ ហ៊ុន សែន ក៏បានអំពាវនាវដល់អ្នកបច្ចេកទេសវិស័យសុខាភិបាល កុំមើលឃើញតែមួយជ្រុងនៃបញ្ហាសុខភាព ត្រូវមើលឃើញវិស័យសេដ្ឋកិច្ច-សង្គម ក៏ដូចជា បញ្ហាចិត្តសាស្ដ្រ ជាដើម។ សម្ដេចថា ប្រទេសមួយចំនួន បានដកចេញវិធានការពាក់ម៉ាស់។ សម្ដេច ក៏រងចាំការប្រជុំនៅល្ងាចនេះ ដឹកនាំដោយ លោក អូន ព័ន្ធមុនីរ័ត្ន ជាមួយលោក ម៉ម ប៊ុនហេង។

សម្ដេចតេជោ បញ្ជាក់បន្ថែមថា តាមគំនិតរបស់ សម្ដេច គឺឲ្យប្រជាពលរដ្ឋជាអ្នកសម្រេចចិត្តក្នុងការពាក់ម៉ាស ឬមិនពាក់ម៉ាស នៅតាមទីសារធាណៈ។ ប៉ុន្ដែកន្លែង បិទជិត និងកន្លែងមានម៉ាស៊ីនត្រជាក់ គប្បីតម្រូវឲ្យពាក់ម៉ាស់។ សម្ដេចថា ការធ្វើបែបនេះ បានកាត់បន្ថយការចំណាយទៅលើគ្រួសារនីមួយៗ។

ជាមួយគ្នានេះ សម្ដេចតេជោ ក៏បានរំលឹកថា នាពេលកន្លងទៅ រាជរដ្ឋាភិបាល បានដកចេញវិធានការពាក់ម៉ាស់នៅខេត្តចំនួន៤ ។ សម្ដេចតេជោបន្ថែមថា ការពាក់ម៉ាស់តម្រូវឲ្យប្រជាពលរដ្ឋចំណាយយ៉ាងធំ ខណៈសម្ដេចថា ក្នុងមួយថ្ងៃ នៅទូទាំងប្រទេសសរុបជារួមចំណាយ១០ម៉ឺនដុល្លារ សម្រាប់ទិញម៉ាស ខណៈមួយខែចំណាយ៣លានដុល្លារ ។

ទន្ទឹមនឹងនេះ សម្តេចតេជោក៏បានអំពាវនាវដល់កងកម្លាំងគ្រប់ផ្នែក ត្រូវជំរុញប្រជាពលរដ្ឋទៅចាក់វ៉ាក់សាំងដូសទី៣ ឲ្យបានគ្រប់ៗគ្នា ព្រោះជាកាតព្វកិច្ច ខណៈនៅសល់ពលរដ្ឋជាង៦លាននាក់ទៀត មិនទាន់ចាក់វ៉ាក់សាំងដូសទី៣ ហើយក៏មានពលរដ្ឋជាង១លាននាក់ បានចាក់ដូសទី៤ ៕

To Top