ភ្នំពេញ៖លោក ហ៊ុន ម៉ានីសមាជិក គណៈកម្មាធិការកណ្ដាលគណបក្សប្រជាជនកម្ពុជាបានគូសបញ្ជាក់ថាដរាបណាមានអង្គការចាត់តាំងបដិវត្តន៍ពណ៌ យើងត្រូវត្រៀមខ្លួនប្ដូរផ្ដាច់ទប់ទល់កម្ចាត់ចោល ដើម្បីសុខសន្តិភាពយូរអង្វែង ។
តាមរយៈបណ្ដាញសង្គមហ្វេសប៊ុកនៅថ្ងៃទី៣ខែឧសភានេះលោក ហ៊ុន ម៉ានី អគ្គលេខាធិការនៃអគ្គលេខាធិការដ្ឋានគណៈចលនាមហាជន គណៈកម្មាធិការកណ្តាលគណបក្សប្រជាជនកម្ពុជា បានធ្វើការក្រើនរំលឹកដល់សមាជិក សមាជិកានៃគណៈកម្មាធិការគណបក្សក្នុងមូលដ្ឋានរាជធានីភ្នំពេញ ឱ្យត្រៀមខ្លួនជាដាច់ខាត ដើម្បីទប់ស្កាត់គម្រោងការធ្វើបដិវត្តន៍ពណ៌ណាមួយ ។
លោកហ៊ុន ម៉ានី បានធ្វើការសង្កត់ធ្ងន់ថា៖ «ដរាបណាមានអង្គការចាត់តាំងបដិវត្តន៍ពណ៌ យើងត្រូវត្រៀមខ្លួនប្ដូរផ្ដាច់ទប់ទល់ ដើម្បីសុខសន្តិភាពយូរអង្វែង »។
លោក ក៏បានផ្តាំផ្ញើឱ្យសមាជិក សមាជិកា គណៈកម្មាធិការគណបក្សមូលដ្ឋានទាំងអស់ រួបរួមគ្នា និងអនុវត្តការងារប្រកបដោយភាពមុតស្រួច ប្រទាក់ក្រឡាគ្នា ដើម្បីបន្តដណ្តើម ប្រៀបឈ្នះឱ្យគណបក្សប្រជាជនកម្ពុជា ជាពិសេសក្នុងការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ នាពេលដ៏ខ្លីខាងមុខ៕
