ភ្នំពេញ ៖ នាកាសពិធីបុណ្យសព សម្ដេចឧត្ដមទេពញាណ ហ៊ុន ណេង សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានថ្លែងថា ត្រកូល ហ៊ុន នៅគ្រប់ជំនាន់មានការស្មោះត្រង់ចំពោះព្រះមហាក្សត្រ រាជបល្ល័ង្គ និងរបបរាជានិយម។
តាមរយៈគេហទំព័រហ្វេសប៊ុក នៅយប់ថ្ងៃទី៧ ខែឧសភា ឆ្នាំ២០២២ សម្ដេចតេជោ ហ៊ុន សែន បានសរសេរថា “បងប្រុស ទោះបីបងបានចែកឋានទៅហើយក្តី តែកេរ្តិ៍ឈ្មោះរបស់បងបានស្ថិតនៅជាមួយជាតិ សាសនា និងព្រះមហាក្សត្រជានិច្ច”។
សម្ដេចតេជោ បន្ដថា មុននេះបន្តិច ព្រះករុណា ព្រះបាទសម្ដេចព្រះ បរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាជាទីសក្ការៈដ៏ខ្ពង់ខ្ពស់បំផុត បានប្រោសប្រទាននូវគោរមងារសម្រាប់បង គឺជាសម្តេចឧត្តមទេពញាណហ៊ុន ណេង។
សម្ដេចតេជោ បន្ថែមថា “តើបងនៅចាំទេ គឺក្បែរកន្លែងតំកល់សពបងនេះហើយដែលបង និងខ្ញុំចូលរួមធ្វើបាតុកម្ម ប្រឆាំងពួកធ្វើរដ្ឋប្រហារ និងទាមទារប្រគល់តំណែងថ្វាយសម្តេចឪ យើងវិញ កាលពីថ្ងៃ២៣ មិនា ១៩៧០ដែលពេលនោះបងអាយុ២០ឆ្នាំ ឯខ្ញុំអាយុ១៨ឆ្នាំ”។
សម្ដេចតេជោ បញ្ជាក់ថា “ត្រកូលហ៊ុនរបស់យើងគ្រប់ជំនាន់តាំងពីជីដូនជីតា ឪពុកម្តាយយើងរហូតដល់ខ្លួនយើង តែងមានការស្មោះត្រង់ចំពោះព្រះមហាក្សត្រចំពោះរាជបល្ល័ង្គ និងរបបរាជានិយម។ ប្អូនជឿជាក់ថា កូនចៅយើងទាំងអស់នឹងដើរតាមផ្លូវដែលយើងបានដើរកន្លងមក ដោយធានាដល់កិច្ចការពាររបបរាជានិយមការពារព្រះមហាក្សត្រ និងព្រះរាជបល្ល័ង្ក ដោយការស្មោះត្រង់”។
សូមបញ្ជាក់ថា សម្ដេចឧត្ដមទេពញាណ ហ៊ុន ណេង ដែលបងប្រុសរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានទទួលមរណភាព ដោយជំងឺបេះដូង នៅរសៀលថ្ងៃទី០៥ ខែឧសភា ឆ្នាំ២០២២នេះ ក្នុងជន្មាយុ៧២ឆ្នាំ។
សពរបស់ សម្ដេចឧត្ដមទេពញាណ ហ៊ុន ណេង បានតម្កល់ធ្វើបុណ្យនៅគេហដ្ឋានភូមិទី៧ សង្កាត់កំពង់ចាម ក្រុងកំពង់ចាម ខេត្តកំពង់ចាម ទៅតាមប្រពៃណីព្រះពុទ្ធសាសនា ហើយនៅថ្ងៃទី៩ ខែឧសភា ឆ្នាំ២០២២ សពលោក ហ៊ុន ណេង នឹងត្រូវដង្ហែទៅបញ្ចុះនៅវត្តសុវណ្ណគិរីរតនៈ ភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម៕
