នយោបាយ

លោក ញឹក ប៊ុនឆៃ ថា មិនអាចរួមសហការ ជាមួយលោក សម រង្ស៊ីបានទេ

ភ្នំពេញ ៖ លោក ញឹក ប៊ុនឆៃ ដែលមានប្រភពចេញ ពីគណបក្សរាជានិយមហ្វ៊ុនស៊ិនប៉ិច ហើយបច្ចុប្បន្នជាប្រធាន គណបក្សខ្មែររួបរួមជាតិ បានលើកឡើងថា លោកមិនអាចទៅចូលរួម ក្នុងជីវភាពនយោបាយ ជាមួយក្រុមប្រឆាំង ជាពិសេសក្រុមលោក សមរង្ស៊ីបាននោះទេ ។ នេះជាការបញ្ជាក់ របស់លោកប្រាប់លោក សយ សុភាព ក្នុងឱកាសលោកទាំង២ បានអញ្ជើញចូលរួមគោរពវិញ្ញាណក្ខន្ធ ម្តាយក្មេក លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន នារសៀលថ្ងៃ១០ សីហា ។

ការអះអាងថា មិនអាចទៅរួមរស់ជាមួយលោក សម រង្ស៊ីបានរបស់លោក ញឹក ប៊ុនឆៃនេះ ក្រោមហេតុផលថា គឺលោកសម រង្ស៊ី ជាអ្នកនិយមអាមេរិក ដែលអាមេរិកដឹកនាំរដ្ឋប្រហារទំលាក់សម្តេចព្រះនរោត្តម សីហនុ នាថ្ងៃ១៨ ខែមីនា ឆ្នាំ១៩៧០។

ម្យ៉ាងទៀតលោកថា ចំណែកខ្លួនលោកបានដង្ហែ សម្តេចព្រះនរោត្តម សីហនុ ដើម្បីរាជានិយម ហើយសម្តេចព្រះបិតាជាតិ ជាមិត្តស្និទបំផុតរបស់ចិន ដែលគាំទ្រគោលនយោបាយចិនតែមួយ ។

លោក ញឹក ប៊ុនឆៃ បានឲ្យដឹងទៀតថា “ចំណែកក្រុមប្រឆាំង សម រង្ស៊ី ដើរតាមអាមេរិក។ នយោបាយសម រង្ស៊ីបង្កអស្ថេរភាព តែយើងត្រូវការសន្តិភាព។ ដូច្នេះគ្មានហេតុផលអ្វី ទៅសហការជាមួយក្រុមក្រៅ ច្បាប់ទេ” ៕

To Top