ភ្នំពេញ៖ អ្នករកស៊ីទទួលបញ្ចាំម៉ូតូ នៅតំបន់ឃ្លាំងរំសេវ ចំនួន៩នាក់ ត្រូវបានអាជ្ញាធរនិងកងកម្លាំង មានសមត្ថកិច្ច រាជធានីភ្នំពេញ ធ្វើការឃាត់ខ្លួននិងបញ្ជួនទៅតុលាការ ពាក់ព័ន្ធករណីបង្រ្កាបកន្លែង កុងស៊ីបញ្ចាំ គ្មានច្បាប់។
នៅលើគនណីហ្វេសប៊ុក នៅព្រឹកថ្ងៃទី២៩ ខែកញ្ញា ឆ្នាំ២០២២នេះ លោក ឃ្លាំង ហួត បានឱ្យដឹងថា មនុស្ស៩នាក់ ត្រូវបានឃាត់ខ្លួន ពាក់ព័ន្ធករណីបង្រ្កាបកន្លែងកុងស៊ីបញ្ចាំ ល្មើសច្បាប់ ក្នុងភូមិសាស្រ្តរាជធានីភ្នំពេញ។
ក្នុងនោះរួមមាន៖
ករណីទី១ ឃាត់ខ្លួនថៅកែ១នាក់ និងកម្មករជួយទុកដាក់មើលថែ របស់ចោរកម្មចំនួន៤នាក់ សរុប៥នាក់ ។
ករណីទី២ ឃាត់ខ្លួនថៅកែ១នាក់ និងកម្មករជួយទុកដាក់មើលថែ របស់ចោរកម្មចំនួន៣នាក់ សរុប៤នាក់ ។
លោក ឃ្លាំង ហួត បន្ថែមថា សូមមេត្តាទុកជូនតុលាការធ្វើការតាមច្បាប់ ថៅកែនិងកម្មករគឺផ្សំគំនិតគ្នា ប្រព្រឹត្តបទល្មើស ។
សូមបញ្ជាក់ថា កាលពីរសៀលថ្ងៃទី២២ ខែកញ្ញា ឆ្នាំ២០២២នេះ ម៉ូតូប្រមាណជាង១.០០០គ្រឿង ត្រូវបានកម្លាំងសមត្ថកិច្ចដកហូតនៅទីតាំងបញ្ចាំដោយខុសច្បាប់ នៅឃ្លាំងរំសេវ ក្នុងខណ្ឌទួលគោក។
ប្រតិបត្តិការត្រួតពិនិត្យទីតាំងបញ្ចាំ ដែលដឹកនាំដោយលោក ឃ្លាំង ហួត អភិបាលរងរាជធានីភ្នំពេញ បានបញ្ជាក់ថា កម្លាំងសមត្ថកិច្ចបានចុះពិនិត្យរកឃើញទីតាំងបញ្ចាំដោយខុសច្បាប់ ចំនួន៩កន្លែងបន្ថែមទៀត ក្នុងនោះរកឃើញ ម៉ូតូសរុបប្រមាណ១,០០០គ្រឿង ដែលគ្មានឯកសារត្រឹមត្រូវ៕
