កំពង់ចាម ៖ រដ្ឋបាលខេត្តកំពង់ចាម នៅរសៀលថ្ងៃទី ១ ខែធ្នូ ឆ្នាំ ២០២៣ នេះ បានប្រារព្ធពិធីដង្ហែរក្បួន ដើម្បីអបអរសាទរ ដែលក្រុមកីឡាករទូក «ង» និងកីឡាករបាល់ទាត់ ដែលប្រកួត ដណ្តើមបានជ័យលាភី ពានរង្វាន់លេខ ១ នាពេលកន្លងទៅថ្មីៗ នេះ ។
មុនពេលដង្ហែរក្បួននេះ អភិបាលខេត្តកំពង់ចាម លោក អ៊ុន ចាន់ដា បានធ្វើពិធីប្រគល់ ពានរង្វាន់ជ័យលាភីលេខ ១ របស់ក្រុមកីឡាបាល់ទាត់ ជូនទៅលោក លី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម និងពានរង្វាន់លេខ ១ ផ្នែកកីឡាប្រណាំងទូក ជូនទៅ លោក ស្រី សុភ័ក្រ្ត អភិបាលរងខេត្តកំពង់ចាមផងដែរ។
សូមរំលឹកថា លទ្ធផលនៃការប្រណាំងទូក គូពិសេស រយៈពេល ៣ថ្ងៃ នៅរាជធានីភ្នំពេញ កាលពីថ្ងៃទី ២៦-២៧-២៨ ខែវិច្ឆិកាឆ្នាំ ២០២៣ កន្លងទៅនោះ ជាលទ្ធផល ទូក «ង» ដែលជាប់ចំណាត់ថ្នាក់ លេខ១ បានទៅលើទូកដែលមានឈ្មោះ «មហាទន្សាយតេជោសែនជ័យ» របស់ខេត្តកំពង់ចាម និងចំណាត់ថ្នាក់លេខ ២ បានទៅលើទូកឈ្មោះ «បារមីមានជ័យ » មកពីខេត្តតាកែវ និងចំណាត់ថ្នាក់លេខ៣ បានទៅលើទូកឈ្មោះ « កោះកេសែនជ័យបារមីព្រះអង្គខ្មៅ» មកពីខេត្តព្រះវិហារ ៕
