លោក ត្រាំ កំណត់កាលបរិច្ឆេទត្រឹមថ្ងៃអាទិត្យសម្រាប់ក្រុមហាម៉ាស់ ដើម្បីទទួលយកផែនការសន្តិភាព ២០ចំណុចនៅតំបន់ហ្គាហ្សា
វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានឧ្យដឹងថា ក្រុមហាម៉ាស់ត្រូវតែទទួលយកផែនការសន្តិភាពចំនួន ២០ចំណុចលើតំបន់ហ្គាហ្សា ត្រឹមម៉ោង ៦ ល្ងាចថ្ងៃអាទិត្យ បើមិនដូច្នេះទេ “ឋាននរកទាំងអស់ ដូចជាគ្មាននរណាម្នាក់ធ្លាប់បានឃើញពីមុនមក នឹងផ្ទុះឡើងប្រឆាំងនឹងក្រុមហាម៉ាស់” ។
លោក ត្រាំ បានឧ្យដឹងនៅលើបណ្ដាញ Truth Social ថាក្រុមហាម៉ាស់ នឹងត្រូវបានផ្តល់ “ឱកាសចុងក្រោយមួយ” ដោយបន្ថែមថា “ប្រជាជាតិនៃមជ្ឈិមបូព៌ា និងតំបន់ជុំវិញលើសពីនេះ រួមជាមួយនឹងសហរដ្ឋអាមេរិក បានយល់ព្រមដោយអ៊ីស្រាអែល បានចុះហត្ថលេខាលើសន្តិភាព បន្ទាប់ពី ៣០០០ឆ្នាំនៅមជ្ឈឹមបូព៌ា” ។
លោកក៏បានជំរុញឱ្យប្រជាជនប៉ាឡេស្ទីន ចាកចេញពីតំបន់ដែលមានគ្រោះថ្នាក់ជាបន្ទាន់ ហើយផ្លាស់ទីទៅកាន់តំបន់ ដែលមានសុវត្ថិភាពជាងនៅតំបន់ហ្គាហ្សា “អ្នករាល់គ្នានឹងត្រូវបានមើលថែយ៉ាងល្អពីអ្នក ដែលរង់ចាំជួយ”។
កាលពីថ្ងៃចន្ទ រដ្ឋបាលលោក ត្រាំ បានបង្ហាញសំណើរចំនួន ២០ចំណុច បន្ទាប់ពីលោក ត្រាំ បានជួបពិភាក្សាជាមួយលោក បេនចាមីន ណេតាន់យ៉ាហ៊ូ ដែលមកទស្សនកិច្ចនៅសេតវិមាន៕
ប្រែសម្រួល ឈូក បូរ៉ា
