បរទេស៖ប្រធានាធិបតី សហរដ្ឋអាមេរិក លោក ដូណាល់ ត្រាំ និងប្រធានាធិបតីតួកគី លោក Recep Tayyip Erdogan តាមសេចក្តីរាយការណ៍ បានពិភាក្សាគ្នាតាមទូរស័ព្ទនៅពេលថ្មីៗនេះ ស្តីពីកិច្ចព្រមព្រៀងឈប់បាញ់គ្នា ក្នុងប្រទេសលីប៊ី និងសង្គ្រាមនៅក្នុងប្រទេសស៊ីរី។
យោងតាមសេចក្តីរាយការណ៍ ពីទីភ្នាក់ងារសារព័ត៌មាន ដែលចេញផ្សាយ នៅថ្ងៃទី២៩ ខែមករា ឆ្នាំ២០២០ បានឲ្យដឹងថា ជំនួយការសេតវិមាន លោក Judd Deere បានមានប្រសាសន៍ប្រាប់ថា មេដឹកនាំទាំងពីររូប បានពិភាក្សាគ្នា អំពីភាពចំាបាច់នៃការលុបបំបាត់ចោលនូវការជ្រៀតជ្រែកពីបរទេស និងការរក្សាបទឈប់ បាញ់គ្នានៅលីប៊ី។
ក្រៅពីនេះ លោក ត្រាំ និងប្រធានាធិបតី តួកគី ក៏បានពិភាក្សាគ្នាអំពីការ ប្រយុទ្ធគ្នានៅក្នុងតំបន់ Idlib ប្រទេសស៊ីរី ជាទីដែលប្រទេស តួកគីនិងរុស្ស៊ី បានព្រមព្រៀងគ្នា កាលពីខែកញ្ញា ឆ្នាំ២០១៨ ថា គួរតែការពារជា តំបន់គ្មានភាពតានតឹងផងដែរ៕ ប្រែសម្រួល៖ប៉ាង កុង
