ព័ត៌មានអន្តរជាតិ

Update: ឧបនាយករដ្ឋមន្រ្តីថៃ Prawit Wongsuwonថា ថៃនឹងបញ្ជូនយន្តហោះ ទៅជម្លៀស ពលរដ្ឋពីក្រុង វូហាន នៅថ្ងៃសៅរ៍

បរទេស៖ លោក Prawit Wongsuwon ឧបនាយករដ្ឋមន្រ្តីថៃ បាននិយាយនៅ ថ្ងៃសុក្រថា យន្តហោះជើងហោះហើរពិសេស នឹងចេញដំណើរនៅ ព្រឹកថ្ងៃសៅរ៍ ដើម្បីទៅយកជនជាតិថៃដែលជាប់គាំងនៅក្នុងទីក្រុងវ៉ូហាន ដែលជាក្រុងរងការវាយ ប្រហារដោយវីរុសផ្លូវដង្ហើមថ្មី។

យោងតាមសារព័ត៌មាន Bangkok Post ចេញផ្សាយនៅថ្ងៃទី៣១ ខែមករា ឆ្នាំ២០២០ បានឱ្យដឹងដោយផ្អែកតាមការលើកឡើងរបស់ឧត្តមសេនីយ៍ Prawit ថា ប្រទេសចិនបានផ្តល់ការអនុញ្ញាតឱ្យយន្តហោះចុះចតនៅក្រុងវូហាន។

ឧត្តមសេនីយ៍ Prawit បន្តថា រដ្ឋមន្រ្តីសុខភាពសាធារណៈ លោក Anutin Charnvirakul កំពុងចាត់ចែងការរៀបចំ សម្រាប់ការជម្លៀសនេះ។

លោកវេជ្ជបណ្ឌិត Narong Aphikulvanich អគ្គនាយករងនៃនាយកដ្ឋានសេវាកម្មវេជ្ជសាស្រ្តបាននិយាយថាពលរដ្ឋថៃចំនួន ៦៤ នាក់ ត្រូវបានបញ្ជាក់ថា ស្ថិតនៅក្នុងទីក្រុង វូហាន ។ ក្រុមវេជ្ជបណ្ឌិតជំនាញខាងជំងឺផ្លូវដង្ហើម និងថ្នាំសង្គ្រោះបន្ទាន់ នឹងស្ថិតនៅលើយន្តហោះនោះដែរ។

លោកវេជ្ជបណ្ឌិត Narong បន្តថា ពួកគេនឹងមានឧបករណ៍ចាំបាច់ ដើម្បីពិនិត្យអ្នកជម្លៀស នៅពេលពួកគេឡើងយន្តហោះ ហើយនឹងពិនិត្យម្តងទៀតបន្ទាប់ពី ពួកគេបានមកដល់ប្រទេសថៃវិញ។

លោកវេជ្ជបណ្ឌិតបញ្ជាក់ថា អ្នកដែលមានរោគសញ្ញា នៃជំងឺ នឹងត្រូវបានបញ្ជូនទៅមន្ទីរពេទ្យយ៉ាងហោចណាស់ ១៤ ថ្ងៃ។ អ្នកផ្សេងទៀតនឹងត្រូវបាន ត្រួតពិនិត្យនៅផ្ទះរបស់ពួកគេ ក្នុងរយៈពេលតែមួយ សម្រាប់រោគសញ្ញាណាមួយនៃជំងឺ៕ ប្រែសម្រួលៈ ណៃតុលា

To Top