សេអ៊ូល៖ កាសែតកូរ៉េខាងជើងមួយកាលពីថ្ងៃសុក្របានព្រមានប្រឆាំងនឹងវិបត្តិអត់អាហារពិភពលោកក្នុងការរំលឹកដល់ទិវាស្បៀងអាហារពិភពលោក ខណៈប្រទេសក្រីក្រមួយនេះនៅតែបន្តតស៊ូនឹងកង្វះខាតអាហាររ៉ាំរ៉ៃផ្ទាល់ខ្លួន។
កាសែតគណៈរដ្ឋមន្រ្តីរបស់កូរ៉េខាងជើងឈ្មោះ Minju Joson បានចុះផ្សាយថាយ៉ាងហោចណាស់មានមនុស្ស ៨២០ លាននាក់នៅជុំវិញពិភពលោក កំពុងទទួលរងនូវភាពអត់ឃ្លានគិតត្រឹមខែមិថុនា ឆ្នាំនេះដែលក្នុងនោះ ២៤៤ លាននាក់ជាកុមារអាយុក្រោម ៥ ឆ្នាំ។
កាសែតបានចង្អុលបង្ហាញថា កម្រិតផលិតកម្មនៅក្នុងវិស័យកសិកម្មនៅទូទាំងពិភពលោក បានធ្លាក់ចុះយ៉ាងខ្លាំងនៅឆ្នាំនេះ ដោយសារលក្ខខណ្ឌអាកាស ធាតុមិនអំណោយផល ដូចជាទឹកជំនន់និងគ្រោះរាំងស្ងួតជាដើម។
មន្ត្រីនោះបានសង្កត់ធ្ងន់ថា ពិភពលោកកំពុងស្ថិតក្នុងគ្រោះថ្នាក់នៃវិបត្តិអត់អាហារដ៏ធំមួយ ចំពេលមានការរីករាលដាលនៃជំងឺឆ្លងទូទាំងពិភពលោកដោយដកស្រង់សម្ដីមន្ត្រីម្នាក់នៅឯកម្មវិធីស្បៀងអាហារពិភពលោក៕
ដោយ ឈូក បូរ៉ា
