តេអេរ៉ង់៖ ទីភ្នាក់ងារសារព័ត៌មាន Tasnim បានរាយការណ៍ថា ប្រធានអង្គការថាមពលអាតូមិក នៃប្រទេសអ៊ីរ៉ង់ (AEOI) បានឲ្យដឹងថា ឃ្លាំងផ្ទុកសារធាតុអ៊ុយរ៉ានីញ៉ូម ដែលចម្រាញ់បាន ២០ ភាគរយរបស់ប្រទេសលោក មានលើសពី ១២០ គីឡូក្រាម។
លោក Mohammad Eslami ប្រធាន AEOI ត្រូវបានដកស្រង់សម្តីដោយលើកឡើងថា ទាក់ទងនឹងការផ្ទុកអ៊ុយរ៉ានីញ៉ូម ចម្រាញ់ ២០ ភាគរយ“ យើងមានលើសពី ១២០ គីឡូក្រាមហើយនៅក្នុងបញ្ហានេះ យើងកំពុងនាំមុខផែនការ” ។
យោងតាមកិច្ចព្រមព្រៀងនុយក្លេអ៊ែរ ឆ្នាំ ២០១៥ ដែលត្រូវបានគេស្គាល់ថា ជាផែនការសកម្មភាពរួមដ៏ទូលំទូលាយ (JCPOA)“ ប្រេងអ៊ុយរ៉ានីញ៉ូម ២០ ភាគរយ ត្រូវបានគេសន្មត់ថា នឹងផ្តល់ឱ្យរ៉េអាក់ទ័រទីក្រុងតេអេរ៉ង់ ប៉ុន្តែវាមិនត្រូវបានផ្តល់ឱ្យនោះទេ” ។
លោកបានបន្ថែមថា“ ប្រសិនបើយើង មិនបានចាប់ផ្តើមផលិតប្រេងឥន្ធនៈ នេះដោយខ្លួនឯងនោះទេ បញ្ហានេះបានក្លាយជាបញ្ហាមួយ របស់យើងនៅថ្ងៃនេះ” នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។
ដំណើរការចម្រាញ់សារធាតុអ៊ុយរ៉ានីញ៉ូម ២០ ភាគរយត្រូវបានចាប់ផ្តើមជាផ្នែកមួយ នៃផែនការសកម្មភាពយុទ្ធសាស្ត្ររបស់អ៊ីរ៉ង់ ដើម្បីប្រឆាំងនឹងទណ្ឌកម្មអាមេរិក ដែលត្រូវបានអនុម័តដោយសភាអ៊ីរ៉ង់ នៅខែធ្នូ ឆ្នាំ ២០២០ ។
យោងតាមច្បាប់របស់សភា AEOI គួរតែផលិតសារធាតុអ៊ុយរ៉ានីញ៉ូម ចំរុះ ២០ភាគរយ ចំនួន ១២០គីឡូក្រាម ក្នុងរយៈពេលមួយឆ្នាំ បន្ទាប់ពីការអនុវត្តផែនការសកម្មភាព ដែលបានចាប់ផ្តើមនៅថ្ងៃទី០៤ ខែមករា ឆ្នាំ ២០២១៕ ដោយ ឈូក បូរ៉ា
