បរទេស៖ ប្រធានាធិបតីអាមេរិកលោក Joe Biden ត្រូវបានជម្លៀសចេញពីផ្ទះរបស់គាត់នៅឆ្នេរ នៅរដ្ឋ Delaware បន្ទាប់ពីយន្តហោះឯកជន គ្មានការអនុញ្ញាតមួយគ្រឿង បានឆ្លងហោះចូលទៅក្នុងដែនអាកាស ដែលបានដាក់កំហិត ខាងលើទ្រព្យសម្បត្តិ ដែលបង្កឱ្យមានការរឹតបន្តឹងសន្តិសុខ។
យោងតាមសារព័ត៌មាន RT ចេញផ្សាយនៅថ្ងៃទី៤ ខែមិថុនា ឆ្នាំ២០២២ បានឱ្យដឹងថា សេវាសម្ងាត់អាមេរិក បាននិយាយនៅក្នុងសេចក្តីថ្លែងការណ៍មួយ ថា ប្រធានាធិបតីត្រូវបានប្រញាប់ប្រញាល់ ទៅកាន់ទីតាំងដែលមានសុវត្ថិភាព ប្រហែលម៉ោង១រសៀលថ្ងៃសៅរ៍ បន្ទាប់ពីយន្តហោះឯកជនមួយគ្រឿង “ច្រឡំ” បានចូលទៅក្នុងតំបន់សុវត្ថិភាពក្បែរផ្ទះវិស្សមកាលរបស់លោក Biden នៅឆ្នេរ Rehoboth រដ្ឋ Delaware ។ ទីភ្នាក់ងារនេះបានបន្ថែមថា “យន្តហោះត្រូវបានបញ្ជា និងអមដំណើរភ្លាមៗចេញ ពីដែនអាកាស ដែលបានដាក់កម្រិត” ។
ទីតាំងសុវត្ថិភាពត្រូវបានគេរាយការណ៍ថា មានស្ថានីយ៍ពន្លត់អគ្គីភ័យនៅក្បែរនោះ។ រថយន្តរបស់លោក Biden ត្រូវបានគេឃើញធ្វើដំណើរទៅកាន់ ស្ថានីយ៍ពន្លត់អគ្គីភ័យ ជាកន្លែងដែលរថយន្ត SUV ដែលប្រធានាធិបតី កំពុងជិះបានបើកនៅខាងក្នុង។ ចរាចរណ៍ត្រូវបានបិទអស់រយៈពេល ជាង២០នាទី ខណៈដែលភ្នាក់ងារសេវាសម្ងាត់ បានសម្អាតតំបន់នោះ និងស៊ើបអង្កេតការគំរាមកំហែងដែលអាចកើតមាន៕
ប្រែសម្រួលៈ ណៃ តុលា
