បរទេស៖ កងកម្លាំងរុស្ស៊ីបានកំណត់ គោលដៅលើឃ្លាំងរំសេវមួយកន្លែង នៅក្នុងតំបន់ Dnepropetrovsk របស់អ៊ុយក្រែន ដោយបានបំផ្លាញគ្រាប់រ៉ុក្កែតប្រភេទ HIMARS ផលិតដោយសហរដ្ឋអាមេរិកជាង ១០០ គ្រាប់ នេះបើយោងតាមការធ្វើបច្ចុប្បន្នភាពពីក្រសួង ការពារជាតិរុស្ស៊ីកាលពីថ្ងៃពុធ។
យោងតាមសារព័ត៌មាន RT ចេញផ្សាយនៅថ្ងៃទី២៧ ខែកក្កដា ឆ្នាំ២០២២ បានឱ្យដឹងថា របាយការណ៍របស់ក្រសួងបានសរសេរថា “កាលពីថ្ងៃទី ២៤ ខែកក្កដា ការវាយប្រហារដោយកងកម្លាំងអាកាសយានិករបស់រុស្ស៊ី លើឃ្លាំងរំសេវមួយនៅជិតកន្លែងតាំងលំនៅនៃ Lyubimovka តំបន់ Dnepropetrovsk បានបំផ្លាញមីស៊ីលជាងមួយរយ សម្រាប់ប្រព័ន្ធរ៉ុក្កែត HIMARS Multiple ផលិតដោយសហរដ្ឋអាមេរិក” ។ មានការកត់សម្គាល់ផងដែរថា បុគ្គលិកយោធាអ៊ុយក្រែនរហូតដល់ ១២០ នាក់ដែលយាមកន្លែង ក៏ដូចជាទាហានស៊ីឈ្នួលបរទេស និងអ្នកឯកទេសបច្ចេកទេស ក៏ត្រូវបានសម្លាប់ផងដែរ។
ការធ្វើបច្ចុប្បន្នភាពនេះធ្វើឡើងបន្ទាប់ពីរបាយការណ៍ក្រសួងការពារជាតិរុស្ស៊ីកាលពីថ្ងៃចន្ទដែលអះអាងថា ទីក្រុងម៉ូស្គូបានកំណត់គោលដៅ និងបំផ្លាញអាវុធដែលផ្គត់ផ្គង់ដោយសហរដ្ឋអាមេរិក រួមទាំងកាំភ្លើងធំនៅភាគខាងលិចអ៊ុយក្រែនដោយប្រើ មីស៊ីល “អាវុធរយៈចម្ងាយឆ្ងាយដែលមានភាពជាក់លាក់ខ្ពស់នៅលើសមុទ្រ”៕
