យូអិន៖ មហាសន្និបាតអង្គការសហប្រជាជាតិ បានអនុម័តសេចក្តីសម្រេចមួយដោយអំពាវនាវ ឱ្យតុលាការយុត្តិធម៌អន្តរជាតិ (ICJ) ផ្តល់យោបល់លើផលវិបាកផ្លូវច្បាប់ នៃការកាន់កាប់ទឹកដីប៉ាឡេស្ទីនដោយខុសច្បាប់ របស់អ៊ីស្រាអែល។
មហាសន្និបាតបានបោះឆ្នោត ៨៧ ទល់នឹង ៦២ ដោយមានសំឡេងអនុប្បវាទចំនួន ៥៣ លើដំណោះស្រាយនេះ ដោយប្រទេសលោកខាងលិចបានបំបែក ប៉ុន្តែមានការគាំទ្រស្ទើរតែជាឯកច្ឆ័ន្ទនៅក្នុងពិភពអ៊ីស្លាម រួមទាំងក្នុងចំណោមរដ្ឋអារ៉ាប់ដែលមានទំនាក់ទំនងធម្មតាជាមួយអ៊ីស្រាអែល។ រុស្ស៊ី និងចិន បានបោះឆ្នោតគាំទ្រដំណោះស្រាយនេះ។
អ៊ីស្រាអែល សហរដ្ឋអាមេរិក និងសមាជិកចំនួន ២៤ ផ្សេងទៀត រួមទាំងចក្រភពអង់គ្លេស និងអាល្លឺម៉ង់ បានបោះឆ្នោតប្រឆាំងនឹងដំណោះស្រាយនេះ ខណៈដែលប្រទេសបារាំងស្ថិតក្នុងចំណោមប្រទេសចំនួន ៥៣ ដែលអនុប្បវាទ។
ICJ ដែលមានមូលដ្ឋាននៅទីក្រុងឡាអេ ដែលត្រូវបានគេស្គាល់ថា ជាតុលាការពិភពលោក គឺជាតុលាការកំពូលរបស់អង្គការសហប្រជាជាតិ ដែលដោះស្រាយជម្លោះ រវាងរដ្ឋនានា។ សេចក្តីសម្រេចរបស់ខ្លួន មានការជាប់កាតព្វកិច្ច ទោះបីជា ICJ គ្មានអំណាចក្នុងការអនុវត្តច្បាប់ ទាំងនោះក៏ដោយ។
មេដឹកនាំប៉ាឡេស្ទីននៅថ្ងៃសៅរ៍នេះ បានស្វាគមន៍ការបោះឆ្នោតដោយមន្ត្រីជាន់ខ្ពស់លោក Hussein al-Sheikh បាននិយាយថាវា “ឆ្លុះបញ្ចាំងពីជ័យជំនះនៃការទូតប៉ាឡេស្ទីន” ។
អ្នកនាំពាក្យរបស់អាជ្ញាធរប៉ាឡេស្ទីនលោក Mahmoud Abbas បានឲ្យដឹងថា “ពេលវេលាបានមកដល់ហើយ សម្រាប់អ៊ីស្រាអែល ដើម្បីធ្វើជារដ្ឋដែលស្ថិតនៅក្រោមច្បាប់ ហើយត្រូវទទួលខុសត្រូវ ចំពោះឧក្រិដ្ឋកម្ម ដែលកំពុងបន្តប្រឆាំងនឹងប្រជាជនរបស់យើង” ៕
ប្រែសម្រួល ឈូក បូរ៉ា
