បរទេស៖ នាវាផ្ទុកយន្តហោះអាមេរិកមួយគ្រឿង របស់សហរដ្ឋអាមេរិក បានមកដល់ទីក្រុងដាណាងភាគកណ្តាល ប្រទេសវៀតណាមហើយកាលពីថ្ងៃអាទិត្យ ដែលមានរយៈពេលប៉ុន្មានសប្តាហ៍ បន្ទាប់ពីរដ្ឋាភិបាលទីក្រុងហាណូយ បានតវ៉ាប្រឆាំងនឹងនាវារបស់ចិន ដែលកំពុងធ្វើដំណើរក្នុងដែនទឹករបស់ខ្លួន។
យោងតាមសារព័ត៌មាន VOA ចេញផ្សាយនៅថ្ងៃទី២៥ ខែមិថុនា ឆ្នាំ២០២៣ បានឱ្យដឹងថា ការចូលមកដល់របស់នាវាផ្ទុក USS Ronald Reagan របស់សហរដ្ឋអាមេរិកនៅទីក្រុងដាណាងនេះ គឺបានកើតឡើងនៅពេលដែលសហរដ្ឋអាមេរិក និងវៀតណាមប្រារព្ធខួបលើកទី១០ នៃ “ភាពជាដៃគូដ៏ទូលំទូលាយ” របស់ប្រទេសទាំងពីរ។
ស្ថានទូតអាមេរិកនៅទីក្រុងហាណូយបាននិយាយថា នាវាផ្ទុកយន្តហោះដែលជាផ្នែកមួយនៃកងនាវាទី៧ របស់សហរដ្ឋអាមេរិក គឺ “គាំទ្រសេរីភាព និងការបើកចំហ” នៅតំបន់ឥណ្ឌូប៉ាស៊ីហ្វិក បានមកដល់ជាមួយនឹងនាវា អមដំណើរពីរគ្រឿងទៀត គឺនាវាផ្ទុកមីស៊ីល USS Antietam និង នាវា USS Robert Smalls ។
មន្ត្រីកងទ័ពជើងទឹកអាមេរិក បានចុះពីលើយន្តហោះ និងចាប់ដៃជាមួយសមភាគីយោធាវៀតណាម នៅក្នុងពិធីដ៏ខ្លីមួយកាលពីរសៀលថ្ងៃអាទិត្យ។
មេបញ្ជាការនាវា USS Ronald Reagan គឺលោក Daryle Cardone បាននិយាយនៅក្នុងសេចក្តីថ្លែងការណ៍មួយថា “នាវិកជាង ៥ ០០០ នាក់នៅលើនាវា USS Ronald Reagan មានបំណងចង់ទៅទស្សនាទីក្រុង Danang និង ស្វែងរកបទពិសោធន៍វប្បធម៌វៀតណាម” ។
វៀតណាម និងសហរដ្ឋអាមេរិក បានចែករំលែកទំនាក់ទំនងពាណិជ្ជកម្ម ជិតស្និទ្ធកាន់តែខ្លាំងឡើង ក៏ដូចជាការព្រួយបារម្ភអំពីការកើនឡើង នៃកម្លាំងរបស់ចិននៅក្នុងតំបន់ ផងដែរ។
នាវាស្រាវជ្រាវរបស់ចិន កប៉ាល់ឆ្មាំឆ្នេរសមុទ្រជាច្រើន និងទូកនេសាទ ជាច្រើនគ្រឿង បានដំណើរការជាច្រើនសប្តាហ៍ នៅក្នុងតំបន់សេដ្ឋកិច្ចផ្តាច់មុខរបស់វៀតណាម នៅសមុទ្រចិនខាងត្បូង ។
ប្រទេសចិនទាមទារផ្លូវទឹក ដែលសម្បូរធនធានភាគច្រើន បើទោះជាមានការប្រកួតប្រជែងទាមទារ ពីប្រទេសអាស៊ីអាគ្នេយ៍ផ្សេងទៀត រួមមានវៀតណាម ហ្វីលីពីន និងម៉ាឡេស៊ីក៏ដោយ។
លោក Nguyen The Phuong បេក្ខជនបណ្ឌិតផ្នែកសន្តិសុខ ដែនសមុទ្រនៅសកលវិទ្យាល័យ New South Wales Canberra បានប្រាប់ AFPថា៖ «ដំណើរទស្សនកិច្ចរបស់នាវា ផ្ទុកយន្តហោះអាមេរិកនេះ ផ្តល់សារថាវៀតណាមកំពុងបន្តរក្សាតុល្យភាព ប្រឆាំងនឹងចិនដោយការកែលម្អទំនាក់ទំនង សន្តិសុខរបស់ខ្លួនជាមួយសហរដ្ឋអាមេរិក និងជាមួយមហាអំណាចខាងក្រៅផ្សេងទៀត» ៕
ប្រែសម្រួលៈ ណៃ តុលា
