ព្រុចសែល៖ ប្រធានក្រុមប្រឹក្សាអឺរ៉ុប លោក Charles Michel បានជូនដំណឹងដល់ប្រព័ន្ធផ្សព្វផ្សាយបែលហ្ស៊ិកអំពីការសម្រេចចិត្តរបស់លោក ក្នុងការឈរឈ្មោះ សម្រាប់ការបោះឆ្នោតសមាជិកសភាអឺរ៉ុប (MEP) នៅខែមិថុនា ដែលនាំឱ្យលោកចាកចេញពីតំណែងពីប្រធានក្រុមប្រឹក្សានៅខែកក្កដា។
ដោយឆ្លុះបញ្ចាំងពីអាណត្តិរយៈពេល ៤ ឆ្នាំរបស់លោកក្នុងនាមជាមេដឹកនាំអឺរ៉ុប លោក Michel បានលើកឡើងថា “វាជាទំនួលខុសត្រូវរបស់ខ្ញុំ ក្នុងការប្រាប់អំពីការងាររបស់ខ្ញុំកាលពីប៉ុន្មានឆ្នាំមុន និងដើម្បីស្នើគម្រោង សម្រាប់អនាគតរបស់អឺរ៉ុប” ។
ខណៈពេលដែលអាណត្តិបច្ចុប្បន្នរបស់លោក Michel បញ្ចប់នៅក្នុងខែវិច្ឆិកា ការបោះឆ្នោតសភាអឺរ៉ុប ត្រូវបានកំណត់សម្រាប់ខែមិថុនា។ លោកត្រូវបានគេរំពឹងថា នឹងដឹកនាំបញ្ជីគណបក្សចលនាកំណែទម្រង់សេរី ដែលគាត់ជាអតីតមេដឹកនាំនៅក្នុងការបោះឆ្នោតសភាអឺរ៉ុប។
លោកបានបញ្ជាក់ថា “នោះមានន័យថា ខ្ញុំនឹងបន្តការងារជាប្រធានក្រុមប្រឹក្សាអឺរ៉ុបរហូតដល់ស្បថចូលកាន់តំណែងជាសមាជិកសភានៅថ្ងៃទី ១៦ ខែកក្កដា” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក Michel បានបម្រើការជាប្រធានក្រុមប្រឹក្សាអឺរ៉ុប ដែលជាក្រុមមេដឹកនាំរដ្ឋាភិបាលនៃរដ្ឋសមាជិកសហភាពអឺរ៉ុប ចំនួន ២៧ ចាប់តាំងពីចុងឆ្នាំ២០១៩ មកម៉្លេះ មុនពេលដែលលោកទទួលបន្ទុកសហភាពអឺរ៉ុប លោកបានបម្រើការជានាយករដ្ឋមន្ត្រីនៃប្រទេសបែលហ្ស៊ិក៕
ប្រែសម្រួល ឈូក បូរ៉ា
