បរទេស៖ អគ្គនាយករងទីមួយរបស់មូលនិធិរូបិយបណ្ណអន្តរជាតិ ឬ IMF លោកស្រី Gita Gopinath បានព្រមាននៅក្នុងបទសម្ភាសន៍ជាមួយទស្សនាវដ្ដី Foreign Policy ដែលបានចេញផ្សាយកាលពីថ្ងៃចន្ទថា រាល់ជំហានឆ្ពោះទៅរកការរឹបអូសយកទុនបំរុងដែលបង្កករបស់រុស្ស៊ី គួរតែត្រូវបានគាំទ្រដោយ “ការគាំទ្រផ្នែកច្បាប់គ្រប់គ្រាន់” ។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែកុម្ភៈ ឆ្នាំ២០២៤ បានឱ្យដឹងថា សហរដ្ឋអាមេរិក និងសហភាពអឺរ៉ុបបានរារាំងទ្រព្យសម្បត្តិប្រមាណ ៣០០ ពាន់លានដុល្លារដែលជាកម្មសិទ្ធិរបស់ធនាគារកណ្តាលរុស្ស៊ីចាប់តាំងពីការចាប់ផ្តើមនៃជម្លោះអ៊ុយក្រែនក្នុងឆ្នាំ២០២២។ ក្នុងចំណោមនោះ ទឹកប្រាក់ចំនួន ១៩៦,៦ ពាន់លានអឺរ៉ូ (២១១ ពាន់លានដុល្លារ) ត្រូវបានកាន់កាប់ដោយការិយាល័យបោសសម្អាត Euroclear ដែលមានមូលដ្ឋាននៅបែលហ្សិក ដែលកាលពីឆ្នាំមុនបានប្រមូលការប្រាក់ជិត ៤,៤ ពាន់លានអឺរ៉ូលើមូលនិធិនេះ។
កាលពីដើមសប្តាហ៍នេះ ក្រុមប្រឹក្សាអឺរ៉ុបបានចាត់វិធានការឆ្ពោះទៅរកការរឹបអូសយកប្រាក់ចំណូលការប្រាក់ដែលមានសក្តានុពលនោះ។ ក្រោយមក ក្រសួងការបរទេសអាមេរិកបានលាតត្រដាងថា ទីក្រុងវ៉ាស៊ីនតោននៅតែបន្ត “ក្នុងការសន្ទនាយ៉ាងសកម្មជាមួយសម្ព័ន្ធមិត្ត និងដៃគូរបស់យើង រួមទាំង G7” អំពីមធ្យោបាយដ៏មានសក្តានុពលក្នុងការរឹបអូសទ្រព្យសម្បត្តិរបស់រុស្ស៊ី។
លោកស្រី Gopinath បាននិយាយថា “ការសម្រេចចិត្តអ្វីដែលត្រូវធ្វើជាមួយទ្រព្យសម្បត្តិដែលបង្កករបស់រុស្ស៊ីគឺមានតែជាមួយប្រទេសដែលកាន់កាប់ទ្រព្យសម្បត្តិទាំងនេះ និងការចរចាក្នុងចំណោមពួកគេ” ។
លោកស្រីបានបន្ថែមថា អ្នកវិភាគរបស់ IMF នឹងវាយតម្លៃពីផលប៉ះពាល់នៃការសម្រេចចិត្តណាមួយដែលបានធ្វើឡើងលើសមាជិករបស់មូលនិធិ និងលើសេដ្ឋកិច្ចពិភពលោក ប្រសិនបើនិងនៅពេលណាដែលវាកើតឡើង៕ ប្រែសម្រួលៈ ណៃ តុលា
