មន្ទីរបញ្ចកោណ ចោទប្រកាន់ឧត្តមសេនីយ៍ ដែលទើបនឹងត្រូវ បានបណ្តេញចេញពីតំណែង ពីបទលេចធ្លាយព័ត៌មានរសើប ទៅកាន់ប្រព័ន្ធផ្សព្វផ្សាយ
វ៉ាស៊ីនតោន ៖ មន្ទីរបញ្ចកោណ បានចោទប្រកាន់ឧត្តមសេនីយ៍ផ្កាយបី ដែលទើបនឹងត្រូវបានបណ្តេញចេញពីតំណែង ពីបទលេចធ្លាយព័ត៌មានរសើប ទៅកាន់សារព័ត៌មាន ត្រឹមតែប៉ុន្មានម៉ោងប៉ុណ្ណោះ បន្ទាប់ពីមន្ត្រីនានាបានបញ្ជាក់ពីការដកតំណែង របស់លោកចេញពីមុខតំណែង ផ្នែកផែនការយោធាជាន់ខ្ពស់មួយ នេះបើយោងតាមការចេញផ្សាយពីសារព័ត៌មាន AP ថ្ងៃទី៣០ ខែតុលា ឆ្នាំ២០២៦ ។
មន្ត្រីក្រសួងការពារជាតិមួយរូបបានឱ្យដឹង កាលពីយប់ថ្ងៃពុធថា រដ្ឋមន្ត្រីការពារជាតិ លោក Pete Hegseth បានបណ្តេញលោកឧត្តមសេនីយ៍ឯក កងទ័ពជើងគោក Brett Sylvia ចេញពីតំណែងជាប្រធានផ្នែកយុទ្ធសាស្ត្រ ផែនការ និងគោលនយោបាយសម្រាប់អគ្គសេនាធិការចម្រុះ (Joint Chiefs of Staff)។ ជាទូទៅ ឧត្តមសេនីយ៍ ដែលកាន់តំណែងនេះ និងបុគ្គលិករបស់ពួកគេ មានភារកិច្ចទទួលខុសត្រូវក្នុងការបង្កើត និងសម្របសម្រួលផែនការយោធា សម្រាប់ទាំងប្រធានអគ្គសេនាធិការចម្រុះ និងប្រធានាធិបតីសហរដ្ឋអាមេរិក។
មិនមានការបញ្ជាក់ពីមូលហេតុណាមួយសម្រាប់ការបណ្តេញចេញនេះទេ ដែលនេះគឺជាករណីថ្មីបំផុតនៃស៊េរីនៃការបណ្តេញចេញ ឬការចាកចេញរបស់ថ្នាក់ដឹកនាំយោធាក្រោមការដឹកនាំរបស់លោក Hegseth។ ទោះជាយ៉ាងណាក៏ដោយ មន្ត្រីមន្ទីរបញ្ចកោណមួយរូប ដែលមិនមានសិទ្ធិធ្វើអត្ថាធិប្បាយជាសាធារណៈ និងបានសុំមិនបញ្ចេញឈ្មោះ បាននិយាយនៅក្នុងសេចក្តីថ្លែងការណ៍មួយនៅពេលក្រោយមកថា លោក Sylvia កំពុងស្ថិតក្រោមការស៊ើបអង្កេត ជុំវិញការចោទប្រកាន់ពីបទចែករំលែកព័ត៌មានសម្ងាត់ (classified information) អំពីសង្គ្រាមអ៊ីរ៉ង់ ជម្លោះរុស្ស៊ី-អ៊ុយក្រែន និងប្រធានបទផ្សេងៗទៀតទៅកាន់អ្នកសារព័ត៌មាន។
សេចក្តីថ្លែងការណ៍នោះបានអះអាងថា លោក Sylvia បានបរាជ័យក្នុងការធ្វើតេស្តចាប់កុហក (polygraph tests) ចំនួនបីដង ទាក់ទងនឹងការលេចធ្លាយព័ត៌មានសម្ងាត់នេះ។
អ្នកនាំពាក្យកំពូលរបស់មន្ទីរបញ្ចកោណ លោក Sean Parnell បាននិយាយនៅក្នុងការបង្ហោះលើបណ្តាញសង្គមថា ក្រសួង “បានចាត់វិធានការផ្នែកបុគ្គលិកដែលចាំបាច់ដើម្បីការពារព័ត៌មានរសើប” ដោយមិនបានបញ្ចេញឈ្មោះលោក Sylvia នោះទេ។ លោកបានបន្ថែមថា បញ្ហានេះត្រូវបានបញ្ជូនទៅក្រសួងយុត្តិធម៌សម្រាប់ “សក្តានុពលនៃចំណាត់ការផ្លូវច្បាប់បន្ថែមទៀត”។
វាមិនទាន់ច្បាស់នោះទេថា ហេតុអ្វីបានជាមន្ទីរបញ្ចកោណហាក់ដូចជាកំពុងស្វែងរកការចោទប្រកាន់នៅក្នុងតុលាការស៊ីវិល ជំនួសឱ្យការកាត់ទោសឧត្តមសេនីយ៍រូបនេះនៅក្នុងប្រព័ន្ធយុត្តិធម៌យោធា។
ទោះជាយ៉ាងណា លោក Sylvia មិនទាន់មានការឆ្លើយតបភ្លាមៗនោះទេ ចំពោះសារជាសំឡេង សារជាអក្សរ អ៊ីមែល និងសារនៅលើបណ្តាញ LinkedIn ដែលផ្ញើទៅកាន់គណនី និងលេខទូរស័ព្ទដែលត្រូវបានគេជឿជាក់ថាជារបស់លោក។
ប្រែសម្រួល៖ គីរី
