ភ្នំពេញ៖ លោក នួន ផារ័ត្ន អភិបាលរងរាជធានីភ្នំពេញ បានលើកឡើងថា កិច្ចសហប្រតិបត្តិការ រវាងរដ្ឋបាលរាជធានីភ្នំពេញ និងសមាគមអន្តរជាតិ អភិបាលក្រុងប្រើប្រាស់ភាសាបារាំង(AIMF) ដែលបាននិងកំពុងអនុវត្តគម្រោងមួយចំនួនធំ នឹងជួយលើកកម្ពស់ ដល់ជីវភាពរបស់ប្រជាពលរដ្ឋ ក្នុងរាជធានីភ្នំពេញ កាន់តែប្រសើរឡើង។
ការលើកឡើងរបស់លោក នួន ផារ័ត្ន បានធ្វេីឡេីងក្នុងពិធី ផ្សព្វផ្សាយឯកសារយុទ្ធសាស្ត្រ នៃកិច្ចសហប្រតិបត្តិការ រវាងរដ្ឋបាលរាជធានីភ្នំពេញ និងសមាគមអន្តរជាតិ អភិបាលក្រុងប្រើប្រាស់ភាសាបារាំង(AIMF) នារសៀលថ្ងៃទី២៣ ឧសភាឆ្នាំ២០២២នេះ នៅសាលារាជធានីភ្នំពេញ ។
លោក នួន ផារ័ត្ន លើកឡើងថា បច្ចុប្បន្ន រាជធានីភ្នំពេញ បានទទួលនូវការអភិវឌ្ឍលើគ្រប់វិស័យ ដោយបានប្រែក្លាយមុខមាត់ នៃរាជធានីដ៏ចំណាស់មួយនេះ ចូលក្នុងតួនាទីមួយ ក្នុងឆាកអន្តរជាតិផងដែរ។ ជាក់ស្ដែង រាជធានីភ្នំពេញ បានក្លាយជាសមាជិក ការិយាល័យ របស់សមាគមអន្តរជាតិ អភិបាលក្រុងប្រើប្រាស់ភាសាបារាំង (AIMF) នៅឆ្នាំ២០០៣ ដែលក្នុងចំណោម សមាជិកទាំងអស់ចំនួន ៣០៧ មានតែសមាជិកចំនួន ២៧ប៉ុណ្ណោះ ដែលត្រូវបានបោះឆ្នោតជ្រើស តាំងជាសមាជិកការិយាល័យអចិន្ត្រៃយ៍របស់សមាគម ទាំងនេះជាមោទកភាពមួយរបស់រាជធានីភ្នំពេញ ។
ក្នុងពិធីផ្សព្វផ្សាយនេះ ក៏មានការធ្វើបទបង្ហាញគម្រោងជាច្រើនដូចជា អំពី ការិយាល័យ ប្រចាំតំបន់អាស៊ីអាគ្នេយ៍ របស់សមាគម AIMF ។ បទបង្ហាញអំពីគម្រោងការគ្រប់គ្រងហានិភ័យ និងការត្រៀមខ្លួន ទល់នឹងគ្រោះទឹកជំនន់ ដែលបានរៀបចំតាក់តែងផែនការត្រៀមបម្រុង និងឆ្លើយតបគ្រោះអាសន្នសម្រាប់រាជធានីភ្នំពេញ ។ បទបង្ហាញអំពីគម្រោងស្តីពី “ការពង្រឹងសមត្ថភាពអាជ្ញាធរថ្នាក់ក្រោមជាតិ នៅកម្ពុជាក្នុងការ រៀបចំផែនការនគរូបនីយកម្ម និងការគ្រប់គ្រងដីធ្លី ដើម្បីកែប្រែមុខមាត់សហគមន៍មិនទាន់រៀបរយ និងធានា នូវលទ្ធភាពក្នុងការទទួលបាន នូវសេវាសាធារណៈជាសារវន្ត” ។ បទបង្ហាញរបស់គម្រោងតាក់តែងឯកសារទីក្រុងឆ្លាត ដែលបានចាប់ផ្ដើមនៅឆ្នាំ២០១៩ ដោយមានអ្នកជំនាញការជនជាតិបារាំងជួយគាំទ្ររៀបចំ និងមានការផ្តល់ធាតុចូលពីស្ថាប័នក្រសួង មន្ទីរ ជំនាញពាក់ព័ន្ធ ដៃគូអភិវឌ្ឍន៍នានា។ បទបង្ហាញអំពីគម្រោងការ គ្រប់គ្រងសំណល់ភក់បង្គន់៕
