បរទេស៖ កប៉ាល់រុស្ស៊ីរាប់សិបគ្រឿងកាលពីថ្ងៃព្រហស្បតិ៍បានចូលរួមក្នុង សមយុទ្ធយោធានៅសមុទ្របាល់ទិកយុទ្ធសាស្ត្រ បន្ទាប់ពីប្រទេស ស៊ុយអែត និង ប្រទេសហ្វាំងឡង់ ដែលថ្មីៗនេះបានប្រកាសប៉ុនប៉ងចង់ចូលរួមជាមួយអង្គការណាតូ។
យោងតាមសារព័ត៌មាន The Moscow Times ចេញផ្សាយនៅថ្ងៃ៩ ខែមិថុនា ឆ្នាំ២០២២ បានឱ្យដឹងថា ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍មួយថា កប៉ាល់នៃកងនាវាបាល់ទិករបស់ខ្លួននឹង “បំពេញការងារហ្វឹកហ្វឺនសម្រាប់ការពារផ្លូវសមុទ្រ និងមូលដ្ឋានកងនាវា” ។
សេចក្តីថ្លែងការណ៍ដដែលបានឱ្យដឹងទៀតថា នាវាចំនួន 60 គ្រឿង និងយន្តហោះចំនួន 40 គ្រឿង បានចូលរួមក្នុងសមយុទ្ធដែលនឹងធ្វើឡើងនៅលើគោកផងដែរនៅឯកន្លែងហ្វឹកហាត់ក្នុងរង្វង់នៃ Kaliningrad របស់រុស្ស៊ី។
សមយុទ្ធកងទ័ពជើងទឹក ធ្វើឡើងចំពេលមានភាពតានតឹងកាន់តែខ្លាំងឡើងរវាងទីក្រុងមូស្គូ និងអង្គការណាតូ បន្ទាប់ពីប្រទេសស៊ុយអែត និងហ្វាំងឡង់ បានដាក់សំណើរបស់ពួកគេ ដើម្បីចូលរួមសម្ព័ន្ធភាពយោធាដឹកនាំដោយសហរដ្ឋអាមេរិក បន្ទាប់ពីការចាប់ផ្តើមយុទ្ធនាការយោធារបស់រុស្ស៊ីនៅអ៊ុយក្រែន។
ប្រសិនបើសមាជិកភាពរបស់ពួកគេ – ដែលត្រូវបានរារាំងដោយប្រទេសតួកគី ត្រូវបានអនុម័ត នោះប្រទេសរុស្ស៊ីនឹងក្លាយជាប្រទេសតែមួយគត់ដែលមិនមែនជាអង្គការណាតូនៅលើសមុទ្របាល់ទិក៕
