គៀវ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី០១ ខែមីនា ឆ្នាំ២០២២ថា អ្នកនាំពាក្យប្រធានាធិបតីអ៊ុយក្រែន លោក Volodymyr Zelensky កាលពីថ្ងៃចន្ទ បានចុះហត្ថលេខា លើការអំពាវនាវជាផ្លូវការមួយ សម្រាប់សហភាពអឺរ៉ុប ហៅកាត់ថា (EU) ដែលស្នើសុំឱ្យមានការចូលរួម ពីអ៊ុយក្រែន តាមរយៈនីតិវិធីពិសេសថ្មីមួយ នេះបើតាមអ្នកនាំពាក្យ ប្រធានាធិបតីលោក Sergii Nykyforov បានលើកឡើងយ៉ាងដូច្នេះ។
នៅក្នុងសេចក្តីថ្លែងការណ៍មួយ នៅលើបណ្តាញសង្គម Facebook លោក Nykyforov បានលើកឡើងថា ឯកសារនេះគឺជាប្រវត្តិសាស្ត្រ សម្រាប់អ៊ុយក្រែន ។
នៅព្រឹកថ្ងៃដដែល លោក Zelensky បានជំរុញឱ្យ EU ផ្តល់សមាជិកភាពអ៊ុយក្រែន ដោយសារតែការវាយលុករបស់រុស្ស៊ី ប្រឆាំងនឹងអ៊ុយក្រែន។
សភាអ៊ុយក្រែនបានអនុម័ត ក្នុងការអានសេចក្តីព្រាងច្បាប់ដំបូង ស្តីពីការរួមបញ្ចូលគោលដៅរបស់អ៊ុយក្រែន ក្នុងការចូលរួមជាមួយអង្គការអូតង់ (NATO)និងសហភាពអឺរ៉ុប ក្នុងរដ្ឋធម្មនុញ្ញក្នុងឆ្នាំ២០១៩ ។
ក្នុងឆ្នាំ២០១៤ នៅគ្រាដែលអាជ្ញាធរនិយមលោកខាងលិច ឡើងកាន់អំណាច ក្នុងប្រទេសអ៊ុយក្រែន រដ្ឋាភិបាលក្រុងងគៀវ បានបោះបង់ចោលគោលនយោបាយ ពហុភាគីរបស់ខ្លួន ហើយបានកំណត់មាគ៌ាឆ្ពោះ ទៅរកសមាហរណកម្មអឺរ៉ុប ។
លើសពីនេះ សភាបានដកហូតឋានៈ មិនចូលបក្សសម្ព័ន្ធរបស់អ៊ុយក្រែន ដោយបើកផ្លូវសម្រាប់សមាជិកភាពរបស់ខ្លួន នៅក្នុងប្លុកយោធា។
ចាប់តាំងពីពេលនោះមក អ៊ុយក្រែនបានពង្រឹងកិច្ចសហប្រតិបត្តិការ ជាមួយសហភាពអឺរ៉ុប និងបង្កើនទំនាក់ទំនងជាមួយអង្គការ NATO ប៉ុន្តែអង្គការទាំង២មិនបានសន្យា ចំពោះអនាគតសមាជិកភាព របស់ទីក្រុងគៀវភ្លាមៗនោះទេ៕ ប្រែសម្រួលដោយ៖ ម៉ៅ បុប្ផាមករា
